“ვერანაირ პოლიტიკურ საქმიანობაზე ვერ იქნება საუბარი უცხო ქვეყნის მოქალაქე სააკაშვილის შემთხვევაში, რომელიც მსჯავრდებულია”, – ამის შესახებ საპარლამენტო უმრავლესობის წევრმა, ალუდა ღუდუშაურმა მესამე პრეზიდენტის, მიხეილ სააკაშვილის ულტიმატუმის – თუ მის სანახავად დეპუტატებს არ შეუშვებენ, მკურნალობაზე უარს იტყვის – კომენტირებისას განაცხადა.
მისი თქმით, საქართველოს კანონმდებლობა მსჯავრდებული და უცხო ქვეყნის მოქალაქის პოლიტიკურ საქმიანობას არ იცნობს.
„ვერანაირ პოლიტიკურ საქმიანობაზე ვერ იქნება საუბარი უცხო ქვეყნის მოქალაქე სააკაშვილის შემთხვევაში, რომელიც მსჯავრდებულია. საქართველოს კანონმდებლობა ასეთ რამეს არ იცნობს. ვურჩევდი ყველა პირს, მით უფრო, მის ადვოკატებს, რომ კარგად გაეცნონ კანონმდებლობას. სააკაშვილი გაჯიუტებული ბავშვივით იქცევა. შესაბამისად, მისი ახირებული მოთხოვნები ერთადერთ მიზანს ემსახურება – მას უჭირს სამართლიანი სასჯელის მიღება, მაგრამ მოუწევს და ეს ადამიანები, პირველ ყოვლისა კი, თავად, ამას უნდა შეეგუონ“, – განაცხადა ალუდა ღუდუშაურმა.
შეგახსენებთ, რომ მესამე პრეზიდენტის, მიხეილ სააკაშვილის “ფეისბუქის” გვერდზე გუშინ მსჯავრდედბული ექსპრეზიდენტის განცხადება გამოქვეყნდა, სადაც ის ამბობს, რომ თუ მასთან დეპუტატების შესვლას არ დაუშვებენ, დღეიდან ის უარს განაცხადებს მკურნალობის კურსზე.