თავდაცვის სამინისტროს „არმიჰოლში“ ნატო-საქართველოს არსებითი პაკეტის (SNGP) ფარგლებში მიღწეული წარმატებებისა და განხორციელებული აქტივობების შესახებ საინფორმაციო ბრიფინგი გაიმართა. შეხვედრას თავდაცვის უწყების ხელმძღვანელი პირები, ნატოს წევრი ქვეყნების დიპლომატიური კორპუსისა და ნატოს ძირითადი ჯგუფის (Nato Core Team) წარმომადგენლები დაესწრნენ.
საერთაშორისო პარტნიორებს სიტყვით თავდაცვის მინისტრის პირველმა მოადგილემ, ლელა ჩიქოვანმა მიმართა და ნატოსთან თავსებადობის გაზრდისა და დაახლოების გზაზე ჩვენი ქვეყნის მტკიცე, თანმიმდევრული მხარდაჭერისათვის მადლობა გადაუხადა. ლელა ჩიქოვანმა არსებითი პაკეტით გათვალისწინებული სხვადასხვა ინიციატივის იმპლემენტაციის პროცესში ლიდერი ქვეყნების პრაქტიკული, პოლიტიკური და ფინანსური დახმარება ხაზგასმით აღნიშნა.
მინისტრის მოადგილემ იმ წარმატეტებსა და პროგრესზეც ისაუბრა, რომელსაც ქართულმა მხარემ, თავდაცვის ძალებმა, ბოლო წლებში, ნატოსთან დაახლოების გზაზე მიაღწია. ნატოს ძირითადი ჯგუფის ლიდერმა, პოლკოვნიკმა ნორბერტ ჰესმა და არსებითი პაკეტის განხორციელების სამმართველოს უფროსმა, ნინო გორგოძემ სტუმრებს 2020-2021 წლის განმავლობაში მნიშვნელოვანი ინიციატივების ფარგლებში განხორციელებულ მნიშვნელოვან პროექტებზე ინფორმაცია მიაწოდეს და 2022 წლის გეგმები გააცნეს.
ღონისძიების ფარგლებში, თავდაცვის მინისტრის პირველმა მოადგილემ საქართველოში ესტონეთის რესპუბლიკის თავდაცვის ატაშე, ვიცე-პოლკოვნიკი კაიდო ლაინიარევი, რომელიც საქართველოში საქმიანობას უახლოეს პერიოდში დასსრულებს თავდაცვის სამინისტროს უწყებრივი მედლით „გენერალი მაზნიაშვილი“ დააჯილდოვა. ლელა ჩიქოვანმა ვიცე-პოლკოვნიკ კაიდო ლაინიარევს ორ ქვეყანას შორის თავდაცვის სფეროში თანამშრომლობის გაღრმავების საქმეში შეტანილი წვლილისთვის მადლობა გადაუხადა და წარმატებები უსურვა.
„მსგავსი საინფორმაციო ბრიფინგები ძალიან მნიშვნელოვანია, რადგან შესაძლებლობა გვეძლევა, ჩვენი მუშაობის შესახებ სხვებს ინფორმაცია მივაწოდოთ, თუ რა გაკეთდა, რა გამოწვევები გვქონდა. ჩვენი ადამიანური და ფინანსური რესურსების თვალსაზრისით, ვფიქრობ, უკეთ მოქმედება შეგვიძლია. იმედი მაქვს, რომ მომავალ წელს ნატო კიდევ უფრო მეტად იქნება წარმოდგენილი საქართველოში, გააგრძელებს საქართველოს სუვერენიტეტისა და ტერიტორიული მთლიანობის მხარდაჭერას. პირველ რიგში, მნიშვნელოვანია დავამარცხოთ პანდემია, რომელიც მუშაობის პროცესში ბევრ რამეს აფერხებს. იმედი მაქვს, უფრო ეფექტიანად გამოვიყენებთ იმ რესურს, რომელიც გვაქვს. ნატოს არა მხოლოდ პრაქტიკული და ადამიანური რესურსებით დახმარების გაწევა, არამედ ქვეყანაში, საერთაშორისო თანამშრომლობის კუთხით, სხვადასხვა რესურსისა და დახმარების სიქრონიზაციაც სურს. საქართველოში ხომ სხვადასხვა საერთაშორისო მანდატით ბევრი ორგანიზაცია საქმიანობს და ეხმარება საქართველოს ინსტიტუციური განვითარების პროცესში, როგორცაა ევროკავშირი, ორმხრივი თანამშრომლობა და სხვა არასამთავრობო ორგანიზაციები. ამიტომ, მუშაობის პროცესში სინქრონიზაციას დიდი მნიშვნელობა ექნება და იმედი მაქვს, მომავალ წელს კიდევ უფრო მეტი მიღწევები გვექნება“, – განაცხადა ნატოს ძირითადი ჯგუფის ლიდერმა, პოლკოვნიკმა ნორბერტჰესმა.
