2019 წლის იანვრიდან არსებობს ვალდებულება, სტრასბურგის სასამართლომ განსაზღვრა კომპენსაცია დეპორტირებულებისთვის. ამ ხნის განმავლობაში რუსეთი უარს ამბობდა ვალდებულების შესრულებაზე. იუსტიციის სამინისტრო, საგარეო საქმეთა სამინისტროსთან ერთად, აქტიურად მუშაობდა ჩვენს ევროპელ პარტნიორებთან მინისტრთა კომიტეტის ფარგლებში, რათა ეს გადაწყვეტილება სისრულეში მოყვანილიყო, – ამის შესახებ იუსტიციის მინისტრის მოადგილემ ბექა ძამაშვილმა განაცხადა.
„მოინახა საკმაოდ პრაგმატული გამოსავალი, რაც გულისხმობს თანხის გადახდას ევროპის საბჭოს ანგარიშზე და შემდეგ უნდა მოხდეს მისი გადანაწილება დაზარალებულებისთვის. სპეციალურად ამ საკითხს მიეძღვნა სხდომა და რუსეთმა უკვე წერილობით აიღო ვალდებულება ამ საკითხის შესასრულებლად და ამ ფორმით მოახდენს თანხის გადახდას. დეკემბრის სხდომაზე კონკრეტული ვადა განისაზღვრა. რუსეთმა ეს ვალდებულება წლის ბოლომდე უნდა შეასრულოს. იმედს ვიტოვებთ, რომ რუსეთი ამჯერად მაინც შეასრულებს ამ ვალდებულებას. ეს იქნება ძალიან დიდი ნაბიჯი, რომ საბოლოოდ ეს გადაწყვეტილება აღსრულდეს და კომპენსაცია დაზარალებულებამდე მივიდეს. დაველოდოთ აღსრულებას და შემდეგ დეტალურად მივაწვდით მოსახლეობას ინფორმაციას თანხის გადანაწილების პროცედურებზე“, – განაცხადა ბექა ძამაშვილმა.