ყოფილი სამხედრო მოსამსახურე დავით ბაიდარაშვილი სოციალურ ქსელში წერს, რომ ტელეკომპანია „პირველის“ ეთერში გავიდა სიუჟეტი, სადაც მას სამშობლოს ღალატში დასდეს ბრალი. ბაიდარაშვილი აცხადებს, რომ ტელეკომპანიის წინააღმდეგ სამართლებრივ ბრძოლას იწყებს.
„პირველ რიგში, დიდი მადლობა ყველას მხარდაჭერისთვის!
რამდენიმე დღის წინ ჩემს მიმართ ისეთი ცილისმწამებლური ბრალდებები გავრცელდა, არავის ვუსურვებდი იმ წნეხს, რაც ბოლო დღეებში მე და ჩემმა ოჯახმა გამოვიარეთ. მე ამ ქვეყნის ჯარისკაცი ვიყავი და თავს ამ ქვეყნის პატრიოტად ვთვლი! არაფერია იმაზე დამამცირებელი და შეურაცხმყოფელი, ვიდრე გაბრალებდნენ სამშობლოს ღალატს! თან ასეთი ბინძური და მდაბიო მეთოდებით! მე ამ ქვეყანაში ვზრდი შვილებს და მთელი ჩემი შეგნებული ცხოვრება, მის სიყვარულს და მსახურებას მივუძღვენი!
საამაყოა, როცა ხარ ჯარისკაცი და შეიძლება დღეს თავდაცვის უწყებაში აღარ ვმუშაობ, მაგრამ ყოველთვის ვიყავი და ვარ ამ პროფესიის ერთგული, ამ ღირებულებებზე ვზრდი მომავალ თაობასაც. თუმცა, ერთის მხრივ, “ტვ პირველის” მიერ მომზადებულმა სამარცხვინო სიუჟეტმა ნათლად აჩვენა, თუ ვინ არიან ქვეყნის რეალური მოღალატეები. არ არის კაცობა, საკუთარი კეთილდღეობის მისაღწევად თანამებრძოლი დაასმინო, გაუგონარი ტყუილი თქვა, მით უფრო, როდესაც ამას აკეთებს ადამიანი, რომელიც თვითონ დიდი ხანი მსახურობდა თავდაცვის ძალებში.
მეორეს მხრივ, მინდა ვისაუბრო ტელევიზიაზე, რომელსაც არანაირი ეთიკის ნორმები არ გააჩნია და ყველაფერს აკეთებს, რომ საქართველოში სიტუაცია დაძაბოს, ემსახურება სიცრუეს, ადამიანების მოტყუებას, არის პოლიტიკური მხარე და მხოლოდ ერთი მიზანი აქვს – როგორმე შეცვალოს ხელისუფლება! ამ ბინძურ ბრძოლაში კი არავის აინტერესებს ადამიანი, მისი ღირსება და უფლებები! თავდაცვის ძალების, ყველაზე ძლიერი ინსტიტუტის დაკნინებით, ისინი მთელს ქვეყანას, მის უსაფრთხოებას უქმნიან საფრთხეს! არ მგონია ამხელა სიბოროტე და დანაშაული ვინმეს ეპატიოს… მე პირადად არ ვაპირებ ვაპატიო!
ამ დღეებში მე მივმართე ყველას – მედიას, არასამთავრობო ორგანიზაციებს, უფლებადამცველებს და აუცილებლად ვაპირებ სამართლებრივ ბრძოლას! ცილისმწამებლებს მოუწევთ პასუხი აგონ საკუთარ ქცევაზე და მჯერა, ამ ბრძოლაში აუცილებლად გავიმარჯვებ! უცნაურია, მაგრამ ჩემი უფლებების დაცვაზე უარი უკვე მივიღე საიასგან, სახალხო დამცველისგან… გადამამისამართეს ჟურნალისტთა ეთიკის ქარტიაში, თუმცა ყველამ იცის, რომ ქარტიამ რაც არ უნდა “გამოიკვლიოს” თემა, მხოლოდ ერთი განცხადებით შემოიფარგლება ეს დანაშაული და პასუხს არავის აგებინებენ!
მაინცდამაინც ყოფილი პრეზიდენტი უნდა ვიყო, რომ ჩემმა სახალხო დამცველმა დამიცვას? მე ხომ არ ვარ პოლიტიკური მხარე, ერთი რიგითი ყოფილი სამხედრო ვარ, რომლის უფლებებიც დაირღვა და ვცდილობ, სამართლიანად ვაგებინო პასუხი ცილისმწამებლებს! იმისთვის, რომ არ დაკნინდეს ქვეყნის სახის, ჯარის სახელი, იმისთვის, რომ მე და ჩემმა შვილებმა ისევ წელგამართულებმა ვიაროთ, იმისთვის, რომ მორიგი სხვა ადამიანი თავისი ტყუილებით არ გაანადგურონ! ამას აუცილებლად მივაღწევ!
Nino Lomjaria საქართველოს ახალგაზრდა იურისტთა ასოციაცია ეგებ ამ წერილის შემდეგ მაინც იფიქროთ, ადამიანის ბედზეც. თქვენც ხომ ამ ქვეყანაში ზრდით შვილებს, ასე არ შეიძლება!“, – წერს ბაიდარაშვილი „ფეისბუქის“ საკუთარ გვერდზე.