პარლამენტში კომიტეტების გაერთიანებულ სხდომაზე, სადაც სათამაშო ბიზნესის ახალი რეგულაციების განიხილვა გაიმართა, სიტყვიერი დაპირისპირება მოხდა, რის შემდეგაც იურიდიულ საკითხთა კომიტეტის თავმჯდომარე ანრი ოხანაშვილმა „ტვ პირველის“ დირექტორი, ვახტანგ წერეთელი სხდომათა დარბაზიდან გააძევა.
“ბატონო ვატო, თქვენ ხართ უზრდელი ადამიანი და მავნე, გადით აქედან და გაიარეთ”, – უთხრა ანრი ოხანაშვილმა ვატო წერეთელს.
“ტვ პირველის” დირექტორმა ვახტანგ წერეთელმა, ანრი ოხანაშვილს ჰკითხა, უთამაშია თუ არა და რომელი ურჩევნია “კრისტალბეთი” თუ “აჭარაბეთი”? – რაზეც პარლამენტის იურიდიულ საკითხთა კომიტეტის თავმჯდომარე ანრი ოხანაშვილმა მას “უზრდელი” უწოდა.
მანამდე, ვატო წერეთელმა აზარტული თამაშების შესახებ კანონმდებლობის გამკაცრების შედეგად ქართული სპორტის მოსალოდნელ ზარალზე ისაუბრა.
„ამ ბიზნესის წარმომადგენლები ამბობენ, რომ ქართულ სპორტს მოაკლდება ძალიან დიდი დაფინანსება. გამოდის, რომ ჩვენ ჩვენს სპორტსმენებს ვტოვებთ ბირჟის, ლოთობის და ნარკომანიის ამარა. თუ მავნებლობა არ არის ეს, რა დააშავა ქართულმა სპორტმა და სპორტსმენებმა. ათიათასობით სპორტსმენი გვყავს, ასობით მილიონი ლარი უნდა გამოაკლდეს ქართულ სპორტს. ამხელა ფული უნდა მოაკლოთ სპორტსმენებს და დატოვოთ ნარკომანიის და ლოთობის ამარა.
დაჩქარებული წესით განხილვა რა არის, თუ არა მედიის ჩაწიხვლა. მოდის ახალი წელი, მედიებმა წლის განრიგი და ბიუჯეტი უნდა შეადგინონ. ჰოპ-ჰოპ, უცებ შევიკრიბოთ და განვიხილოთ, რა არის, თუ არა მედიის ჩაწიხვლა“,- განაცხადა ვატო წერეთელმა.
სხდომიდან გაძევებამდე ანრი ოხანაშვილმა ვატო წერეთელს ზრდილობისკენ მოუწოდა და გააფრთხილა, რომ წესები დაეცვა.
შეგახსენებთ, აზარტული თამაშობის, ტოტალიზატორის, ლოტოს, ბინგოს და მათი ორგანიზატორების შესახებ რეკლამის გავრცელება შეიზღუდება. აკრძალვები შემოდის სატელევიზიო რეკლამის ნაწილში. ამ მიმართულებით ცვლილებები ორ კანონში – “რეკლამის შესახებ“ და “მაუწყებლობის შესახებ“ კანონებში ხორციელდება.
იკრძალება აზარტული თამაშების, ტოტალიზატორის რეკლამის გავრცელება, გარდა იმ შემთხვევისა, თუ აღნიშნული რეკლამა იმ ვებგვერდზე განთავსებით ვრცელდება, რომელზედაც დაშვებულია სისტემურ-ელექტრონული ფორმით აზარტული თამაშობის, ტოტალიზატორის, ლოტოს, ბინგოს, აზარტული თამაშობის მოწყობის ორგანიზატორის, ტოტალიზატორის მოწყობის ორგანიზატორის, ლოტოს მოწყობის ორგანიზატორის და ბინგოს მოწყობის ორგანიზატორის მოწყობა.