ციციშვილის კლინიკის სამედიცინო დირექტორის, მაია ჩხაიძის განცხადებით, მათ სამედიცინო დაწესებულებაში მყოფი 106 პაციენტიდან ორის მდგომარეობა უკიდურესად მძიმეა.
„ამჟამად კლინიკაში 106 პაციენტი მკურნალობს, მათგან 17 რეანიმაციაში. კრიტიკულად მძიმეა 2 ჩვილის მდგომარეობა, რომლებიც მართვით სუნთქვაზე იმყოფებიან. კლინიკაში მყოფი, 12 წელს გადაცილებული არცერთი ბავშვი აცრილი არ არის“, – განაცხადა მაია ჩხაიძემ.
ამ დროისთვის საქართველოში კორონავირუსის 898 079 შემთხვევაა დადასტურებული. მათ შორის გამოჯანმრთელდა 844 875, გარდაიცვალა 12 879 პაციენტი.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.