საქართველოსა და უკრაინას აქვთ უფლება, თვითონ აირჩიონ საკუთარი მოკავშირეები. რუსეთს არ აქვს უფლება ამ ორი ქვეყნის არჩევანზე რაიმე გავლენა იქონიოს. ნატო გააგრძელებს ძლიერი პოლიტიკური და პრაქტიკული დახმარების უზრუნველყოფას პარტნიორებისადმი, – ამის შესახებ ნატოს გენერალურმა მდივანმა, იენს სტოლტენბერგმა საქართველოს პრემიერ-მინისტრთან, ირაკლი ღარიბაშვილთან შეხვედრის შემდეგ განაცხადა.
„ბატონო პრემიერ-მინისტრო, მიხარია, რომ კვლავ გმასპინძლობთ ნატოს სათავო დაწესებულებაში. ჩვენ მჭიდრო პარტნიორები ვართ, საქართველო ნატოს ერთ-ერთი უახლოესი პარტნიორია და რიგაში მოკავშირეებმა მტკიცედ დაადასტურეს, რომ საქართველოს სუვერენიტეტი და ტერიტორიული მთლიანობა ურყევია. ვაგრძელებთ რუსეთის მოწოდებას, რომ გაიყვანოს ძალები საქართველოს ოკუპირებული რეგიონებიდან. დღეს ჩვენ ვისაუბრეთ რეგიონში არსებულ სიტუაციაზე, უკრაინის ტერიტორიაზე რუსეთის ქმედებებზე, შავი ზღვის უსაფრთხოების საკითხებზე. ჩვენ ვთანხმდებით, რომ ნატო ფხიზლად იქნება და ამ რეგიონში ესკალაციას თავიდან აიცილებს. ამ რეგიონში ნებისმიერი აგრესია ძვირად დაუჯდება რუსეთს. საქართველოსა და უკრაინას აქვთ უფლება, თვითონ აირჩიონ საკუთარი მოკავშირეები. რუსეთს არ აქვს უფლება ამ ორი ქვეყნის არჩევანზე რაიმე გავლენა იქონიოს. ნატო გააგრძელებს ძლიერი პოლიტიკური და პრაქტიკული დახმარების უზრუნველყოფას პარტნიორებისადმი. ჩვენ მზად ვართ, განვამტკიცოთ საქართველოს თავდაცვისა და უსაფრთხოების შესაძლებლობები საზღვაო მიმართულებით, ინფორმაციის გაზიარების კუთხით“, – აცხადებს სტოლტენბერგი.