“იაშვილის სახელობის ბავშვთა ცენტრალური საავადმყოფოს” სამედიცინო დირექტორის, იმუნიზაციის ტექნიკურ მრჩეველთა ეროვნული ჯგუფის ხელმძღვანელის, თსსუ- ის პროფესორ ივანე ჩხაიძის განცხადებით, COVID 19-ის ახალი შტამით, ,,ომიკრონით” დაავადებული 78 000 პაცინეტის შესწავლის შედეგად აღმოჩნდა, რომ „ომიკრონით“ გამოწვეული დაავადება ხანმოკლეა, 3-დღეს გრძელდება, პაციენტებს ჰოსპიტალიზაცია ძალიან იშვიათად სჭირდებათ, ვაქცინები ინფიცირებისგან დაცვის თვალსაზრისით არ მოქმედებენ, მაგრამ მძიმე შემთხვევებისა და ჰოსპიტალიზაციისგან დაცვის თვალსაზრისით მუშაობენ.
მისი თქმით, კვლევა სამხრეთ აფრიკაში ჩატარდა და მისი შედეგები რამდენიმე საათის წინ გამოქვეყნდა.
ჩხაიძემ უახლესი კვლევის შედეგების შესახებ მედიაჰოლდინგ “კვირას” პრესკლუბში გამართულ პრესკონფერენციაზე ისაუბრა.
„მინდა, კვლევის შედეგები წარმოგიდგინოთ, რომელიც რამდენიმე საათის წინ გამოქვყენდა. იცით, რომ ჯერჯერობით „ომიკრონის“ გარშემო ინფორმაცია ერთეულ შემთხვევებს ეფუძნეობდა. სამხრეთ აფრიკაში 78 000 პაციენტის შესწავლის შედეგი სულ რამდენიმე საათის წინ გამოქვეყნდა, რაც „ომიკრონის“ კლინიკური მიმდინარეობის, სიმძიმისა და ვაქცინების ეფეტიანობის შესახებ უკვე რეალურ სურათს გვაძლევს.
პირველი, რაც ძალიან მნიშვნელოვანია და ცოტათი მოულოდნელი: როდესაც ჩვენ წინა პერიოდში იმის შესახებ ვსაუბრობდით, თუ რამდენად ეფექტიანი იყო ვაქცინები, ყოველთვის ხაზს ვუსვამდით, რომ ორი დოზა ვაქცინა, მათ შორის, „ფაიზერი“, „ომიკრონის“ წინააღმდეგ ეფექტიანი არ არის. ის კვლევა, რომელიც რამდენიმე საათის წინ გამოქვეყნდა, მიუთითებს, რომ „ფაიზერის“ ვაქცინა ინფიცირების შემთხვევების თავიდან ასაცილებლად ეფექტიანია 33 %-ით, მაგრამ მძიმე მიმდინარეობის თავიდან აცილების თვალსაზრისით ძალიან მაღალია ეფექტიანობა – 70 %.
შესაბამისად, 2 დოზა „ფაიზერის“ ვაქცინა ეფექტიანი აღმოჩნდა საავადმყოფოში, მძიმე შემთხვევების თავიდან აცილების თვალსაზრისით. რაც კიდევ უსვამს ხაზს იმას, რომ „ბუსტერ“ დოზა, რა თქმა უნდა, მაქსიმალურად ეფექტიანი იქნება“, – განაცხადა ჩხაიძემ.
მისივე თქმით, ორჯერადად აცრილების ინფიცირების რისკი მაღალია.
„ადამიანების, რომლებმაც გაიკეთეს 2 დოზა „ფაიზერი“ , 2 დოზა „ასტრაზენეკა“ და ა.შ. ინფიცირების რისკი ძალიან მაღალია და ამ კვლევაში აღნიშნულია, რომ რეინფიცირების თვალსაზრისით „ომიკრონი“ სრულიად გამორჩეული მუტაციაა და ჩვენთვის, ყველასთვის საშიში „დელტა“ ვარიანტის შესაძებლობებს გაცილებით აღემატება. მაგრამ, საბედნიეროდ, 2 დოზა ვაქცინა გარკვეულწილად საკმარისია იმისათვის, რომ მძიმე შემთხვევებისგან თავი დავიცვათ.
მეორე და ასევე ძალიან მნიშვნელოვანი ინფორმაცია ეხება შემთხვევებს, რომელიც საავადმყოფოში მოხვდა. ამ კვლევაში დაფიქსირებულია, რომ ძალიან ცოტაა იმ ადამიანების რაოდენობა, რომელთა კლინიკური მიმდინარეობა მძიმე იყო და საავადმყოფოში მოხვედრა დასჭირდათ. მაგრამ ერთი მაჩვენებლი, რომელიც ბავშვებისთვისაა ძალიან საყურადღებო, არის ის, რომ „ომიკრონის“ შემთხვევაში ბავშვებში საავადმყოფოში მოხვედრის და ინფიცირების რისკი ძალიან მაღალია. ინფიცირების რისკი მაღალია, გაცილებით მეტი, ვიდრე „დელტას“ შემთხვევაში იყო“, – განაცხადა ჩხაიძემ.
მან „ომიკრონის“ სიმპტომებიც განმარტა.
„ის, რაც ყველაზე მეტად გვაინტერესებს: არის, თუ არა „ომიკრონი“ კლინიკური მიმდინარეობით მსუბუქი: 78 000 პაციენტის შესწავლის შედეგად გარკვეულად შეგვიძლია, ვთქვათ, რა კლინიკური ნიშნები ახასიათებს ამ მუტაციას და არის, თუ არა ზოგადად მძიმე. არ არის მძიმე. დაფიქსირებულია, რომ ამ მუტაციით გამოწვეული დაავადების კლინკური ნიშნები 3 დღის განმავლობაში გრძელდება, 3-დღიანი ავადობა ახასიათებს ძირითადად. ეს არის ყელის ჩაფხაჭნის შეგრძნება, მშრალი ხველა, თავის და კუნთების მსუბუქად გამოხატული ტკივილი. ამით მთავრდება ყველაფერი. ანუ ძალიან ჰგავს მარტივ გაციებას. 78 000 შემთხვევის ანალიზით ხაზგასმულია, რომ დაავადება არის ხანმოკლე, 3-დღიანი, ძალიან იშვიათად სჭირდება ჰოსპიტალიზაცია, ვაქცინები ინფიცირებისგან დაცვის თვალსაზრისით არ მოქმედებენ, მაგრამ მძიმე შემთხვევებისა და ჰოსპიტალიზციისგან დაცვის თვალსაზრისით მოქმედებენ.
მნიშვნელოვანია, რომ ბავშვებში საავადმყოფოში მოხვედრის რისკი „ომიკრონის“ შემთხვევაში 20 %-ით მაღალია, ვიდრე „დელტას“ დროს იყო. მაგრამ კლინიკური მიმდინარეობა, როგორც ბავშვებში, ისე დიდებში, მსუბუქია. რეინფიცირების რისკი 3 -ჯერ მეტია ვიდრე „დელტას“ შემთხვევაში“, – განაცხადა ჩხაიძემ.