გორის სამხედრო ჰოსპიტალთან მიხეილ სააკაშვილისთვის დაბადების დღის მისალოცად და სოლიდარობის გამოსაცხადებლად გვიან ღამით “ნაციონალური მოძრაობის” წევრები, სამოქალაქო აქტივისტები და მხარდამჭერები შეიკრიბნენ. მათ ადგილზე ბანერები წარწერით “თავისუფლება მიხეილ სააკაშვილს” მიიტანეს და ჰაერში სიმბოლურად ფრანები გაუშვეს. მხარდამჭერებმა ჰოსპიტალთან საქართველოს ეროვნული ჰიმნიც ჩართეს.
შეკრებულებმა მიხეილ სააკაშვილს იუბილე ხმამაღალი შეძახილებით მიულოცეს, პასუხად კი მესამე პრეზიდენტმა საკნად ადაკეთებული პალატის ფანჯრიდან მადლობა გადაუხადა და თეთრი ხელსახოცი ააფრიალა.
დიდი მადლობა მთელ საქართველოს! ჩვენ აუცილებლად ვიქნებით თავისუფალი და გამარჯვებული! ვერანაირი ივანიშვილი და მისი ბანდა ჩვენ ვერ მოგვერევიან, ჩვენ ვიცით რას ვაკეთებთ…მეგობრებო, მთავარია ერთიანობა შეტევა ბოლომდე, არ შეშინება, ნუ გეშინიათ ნურანაირი რეპრესიების. მე არ მეშინია, მე ვიბრძვი ბოლომდე… გავათავისუფლოთ ქვეყანა დიქტატურისგან, თქვენი ძალიან დიდი იმედი მაქვს, მთავარია ერთობა, მთავარია არჩამოშლა, მთავარია მივაწვეთ ბოლომდე და ჩვენ აუცილებლად შევალთ ევროპაში, როგორც მოწინავე ქვეყანა, – მიმართა პრეზიდენტმა შეკრებილებს.
გორის სამხედრო ჰოსპიტალთან ასობით პოლიციელი იყო მობილიზებული.
მიხეილ სააკაშვილს დღეს, 21 დეკემბერს 54 წელი შეუსრულდა.