ეკონომიკური ტრანსფორმაციის ცენტრის პრეზიდენტის, რამაზ გერლიანის ადგილსამყოფელი ისევ უცნობია. გაუჩინარებულ ანალიტიკოსს შინაგან საქმეთა სამინისტრო ამ დრომდე ეძებს. ავჭალაში საგამოძიებო მოქმედებები გვიან ღამემდე მიმდინარეობდა.
გერლიანის და ამბობს, რომ მისმა ყოფილმა რძალმა პოლიციას ცრუ ჩვენება მისცა და ის საქმესთან დაკავშირებულ პოლიციელს ხელს აფარებს.
“გამოძიებამ დამისვა კითხვები ოდესმე იყო თუ არა ცოლ-ქმარს შორის კონფლიქტი, თუნდაც ვინმესთან ჰქონდა თუ არა ჩემ ძმას კონფლიქტი, როგორი პიროვნება იყო. ჩემი რძლის პოსტებიც წავიკითხე, მან მისცა ცრუ ჩვენება პოლიციას, პოლიციასთან უარყო თითქოს ამ პიროვნებას საერთოდ არ იცნობს და ჩემი ძმა ბოდავს. ეს ქალბატონი რაღაცას აფარებს ხელს, რაღაცას კი არა, იმ პიროვნებას კარგად იცნობს, კარგადაა გათვიცნობიერებული რას მოქმედებდნენ რამაზ გერლიანის წინააღმდეგ”, – ამბობს გერლიანის და, ნანა გერლიანი.
შეგახსენებთ, რომ რამაზ გერლიანის ძებნა ოჯახმა 19 დეკემბრიდან დაიწყო. მისი მანქანა მიტოვებული ავჭალის პოლიციასთან ნახეს. გაუჩინარებამდე გერლიანმა ფეისბუქზე პოსტი დაწერა და პოლიციელი გიორგი გოგნიაშვილი ზეწოლაში დაადანაშაულა. ფეისბუქ-პოსტი სოციალურ ქსელში უკვე აღარ იძებნება. უცნობია რა მიზეზით.
საქმეზე გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.