ვაქცინების მარაგი ქვეყანაში გვაქვს. მათი ეფექტიანობა კვლავ ძალაში რჩება „ომიკრონთან“ მიმართებით, განსაკუთრებით ჰოსპიტალიზაციისა და სიკვდილიანობის თავიდან აცილების კუთხით, რაც ძალიან მნიშვნელოვანია, – ამის შესახებ თამარ გაბუნიამ „ქრონიკაში“ განაცხდა. ჯანდაცვის მინისტრის მოადგილის თქმით, მთავრობა აგრძელებს მოლაპარაკებებს მომწოდებლებთან ვაქცინების მარაგის შესავსებად.
„გრძელდება მუშაობა მომწოდებლებთან – როგორც Pfizer-თან, ასევე COVAX-პლატფორმასთან, იმისთვის რომ ვაქცინების მარაგი შეივსოს. ცოტა ხნის წინ ახალი ვაქცინა – Novavax-ი გამოჩნდა და ამაზეც ვმუშაობთ, Johnson&Johnson-ს ვაქცინაზეც მიდის მუშაობა. ბუნებრივია, Sinopharm-ისა და Sinovac-ის მარაგი არის და ისინი გამოიყენება როგორც პირველი-მეორე, ასევე ბუსტერ დოზებისთვის. ამდენად, მთავარია მოქალაქემ დროზე მიიღოს გადაწყვეტილება. არჩევანი კვლავ არის და იქნება, ასე რომ ამ მიმართულებით პრობლემებსა და შეფერხებებს არ ველოდებით“, – განაცხადა გაბუნიამ.