ეს არ არის ომი მხოლოდ უკრაინის, ევროპის, არამედ ომია დემოკრატიის საერთაშორისო წესრიგის წინააღმდეგ. ჩვენ არ გვაქვს ფუფუნება მსჯელობის კლუბი ვიყოთ, – განაცხადა ლიეტუვის პრეზიდენტმა, გიტანას ნაუსედამ უკრინაში მიმდინარე მოვლენებზე საუბრისას.
მისი თქმით, უნდა გადადგან ნაბიჯები უკრაინის ევროკავშირში ინტეგრაციის გზაზე და ისაუბრონ უკრაინისთვის კანდიდატის სტატუსის მინიჭებაზე.
„სახეზეა, რუსეთის მიერ უკრაინის მიმართ განხორციელებული სამხედრო აგრესია. ომის დაწყებამდე პოლონეთის პრეზიდენტთან ერთად ერთ-ერთი ბოლო ლიდერი ვიყავი, ვინც ზელენსკის შევხვდი. რამდენიმე საათში ომი დაიწყო. საქმე გვაქვს ყოვლად მიუღებელ სამხედრო მოქმედებასთან. ჩვენ რუსეთის შესაკავებლად არსებული ყველა რესურსი უნდა გამოვიყენოთ. სამწუხაროდ, ჩვენ დიპლომატიური გზებით წარმატებას ვერ მივაღწიეთ და ომის დაწყება ვერ შევაჩერეთ. ეს არის უკრაინის ტრაგედია. ეს არის ტრაგედია მთელი ევროპისთვის; ხაზგასმით ვაცხადებ, ეს არის ტრაგედია რუსეთის ფედერაციისთვის. ეს არ არის ომი მხოლოდ უკრაინის, ევროპის, არამედ ომია დემოკრატიის საერთაშორისო წესრიგის წინააღმდეგ. ჩვენ არ გვაქვს ფუფუნება მსჯელობის კლუბი ვიყოთ. მე მჯერა ევროკავშირის რესურსის. შევაჩეროთ მსგავსი ქმედებები ევროკავშირის შუაგულში. ჩვენ მუდმივად მსჯელობის რეჟიმში ვერ ვიქნებით. უნდა გადავდგათ ეფექტიანი ნაბიჯები უკრაინის ევროკავშირში ინტეგრაციის გზაზე. უნდა ვისაუბროთ უკრაინისთვის კანდიდატის სტატუსის მინიჭებაზე. უკრაინას დახმარება სჭირდება დღეს! ხვალ უკვე ძალიან გვიან იქნება. ამას მოითხოვს დემოკრატია და ჩვენი ღირებულებები. რუსეთის პრეზიდენტმა უპატივცემულობით უპასუხა ევროკავშირის მცდელობას, კონფლიქტი მშვიდობიანი გზებით გადაჭრილიყო. მან ბევრჯერ იცრუა და ეს არის მიზეზი, რის გამოც მომხდარი გაკვეთილად უნდა იქცეს. ვერავინ გადაწყვეტს, ვინ უნდა იყოს უკრაინის პრეზიდენტი. ეს უკრაინელი ხალხის გადასაწყვეტია“, – განაცხადა ლიეტუვის პრეზიდენტმა.