ჩვენ დიდად ვაფასებთ ჰუმანიტარულ დახმარებას, რომელიც გაგვიწია საქართველოს მთავრობამ 1 მილიონი ლარის სახით. ასევე იმ მოქალაქეებისთვის დახმარების გაწევას, რომლებიც დარჩნენ საქართველოს ტერიტორიაზე, – ამის შესახებ საქართველოში უკრაინის დროებითმა რწმუნებულმა, ანდრეი კასიანოვმა ბრიფინგზე განაცხადა.
„ჩვენთვის ცნობილია, რომ საქართველოს ტურიზმის ადმინისტრაციამ უზრუნველყო ჩვენი ტურისტების დაბინავება სასტუმროებში. უკრაინელი ტურისტებისთვის ამოქმედებულია ცხელი ხაზი, „საქართველოს ფოსტა“ კი უფასოდ აგზავნის ჰუმანიტარული დანიშნულების ამანათებს უკრაინაში, ასევე უკრაინაში იგზავნება ჰუმანიტარული დახმარება და იქ მიემგზავრებიან ქართველი ექიმები. ასევე მიმდინარეობს სამუშაოები უკრაინაში სამედიცინო პრეპარატებისა და აღჭურვილობის გაგზავნასთან დაკავშირებით. ასევე საქართველოს პარლამენტის 65-მა დეპუტატმა ჩააბარა სისხლი უკრაინის დასახმარებლად. როგორც ცნობილია, საქართველოს ეროვნულმა ბანკმა გახსნა ანგარიში უკრაინელების დასახმარებლად“, – განაცხადა კასიანოვმა.