ზელენსკი გმირია, ძალიან ბევრ ევროპელ პოლიტიკოსს მისცა მაგალითი და აჩვენა, როგორი უნდა იყოს სახელმწიფო მოღვაწე, ქვეყნის ლიდერი, პრეზიდენტი და მთავარსარდალი, მაგრამ მარტო ზელენსკი არა, ჩემთვის გმირია ყველა უკრაინელი, ვინც იარაღი აიღო და იბრძვის: ბავშვები, ქალები, მასწავლებლები, – ამის შესახებ ევროპარლამენტარმა მარინა კალიურანდმა „ქრონიკას“ განუცხადა.
მისი თქმით, გმირია ყველა, ვინც დამოუკიდებლობისთვის და ევროპაში მშვიდობისათვის იბრძვის.
„პუტინი რას გააკეთებს, ვფიქრობ, მისმა უახლოესმა გარემოცვამაც არ იცის. ერთადერთი რაც ნამდვილად ვიცით, ომია უკრაინაში, ომია ევროპაში და ეს ომი რუსეთმა დაიწყო. ათიათასობით სამხედრო თვეობით იდგა უკრაინის საზღვართან და გადავიდა შეტევაზე. კიევთან დგას სამხედრო ტექნიკა, იბომბება ქალაქი და იხოცება ხალხი. ისმის კითხვა, რატომ წავიდნენ კიევისკენ თუ მათ კიევში შესვლა არ უნდათ?!. ჩვენ ვფიქრობთ და იყო სადაზვერვო ინფორმაცია, რომ მას ჰქონდა გეგმა მეიდანზე შესვლის, მიზნად დასახული ჰქონდა ზელენსკის მკვლელობა და უკრაინელმა ხალხმა ის შეაჩერა“, – განაცხადა მარინა კალიურანდმა.