ვფიქრობ, არასდროს არსად ასეთი დამოკიდებულება არ გამოუხატავთ ჩვენ მიმართ, როგორც დღეს საქართველოშია. უნიკალური ქვეყანაა საქართველო, – ამის შესახებ უკრაინის მოქალაქემ, ალექსანდრა სახაროვამ განაცხადა.
იგი თავის რამდენიმე მეგობართან ერთად საქართველოში ტურისტად იყო ჩამოსული, როდესაც უკრაინაში საომარი მოქმედებები დაიწყო. ალექსანდრა სახაროვა ამბომს, რომ ახლა მასში ორი, აბსოლუტურად განსხვავებული ემოცია ტრიალებს, რომელიც უკრაინაში საომარი მოქმედებებსა და საქართველოში მის დღევანდელ ყოფას უკავშირდება.
„საქართველო არაჩვეულებრივი ქვეყანაა. ახლა ჩემში ორი, აბსოლუტურად განსხვავებული ემოცია ტრიალებს. ერთი – დაუჯერებლად საშინელი – ადამიანებს ასეთი ზიანის მიყენება შეუძლიათ. 21-ე საუკუნეში, ნაცვლად იმისა, რომ რაკეტებს კოსმოსში უშვებდნენ, ისინი ქალაქებისა და მშვიდობიანი მოსახლეობისკენაა მიმართული. რატომ? და მეორე – ის, რაც საქართველოში ვნახე.
აფთიაქში წამლებს ვყიდულობდი. აბსოლუტურად უცნობი ადამიანი დაინტერესდა, რაიმე ხომ არ მჭირდებოდა. მერე უცებ ჯიბეში 100 ლარი ჩამიდო და ისე გავიდა, ვეღარ დავეწიე. მარკეტში პროდუქტები გავატარე და ასევე უცნობმა აპარატზე გადახდის ბარათის დადება მომასწრო. ვერც მივხვდით, რა ხდებოდა. აქ, სასტუმროს ნომრის ასაღებად შემოვედით და გვითხრეს, რომ ფულს არ აიღებდნენ და შეგვეძლო, უფასოდ გვეცხოვრა.
ეს უბრალოდ დაუჯერებელია. როგორ შეუძლია ამდენ ადამიანს გულწრფელი მხარდაჭერა. ჩვენთვისაც კი რთულია აქციაზე წასვლა. ყოველდღე ათასობით ადამიანი იკრიბება. მგონი, სწორედ აქ, საქართველოში უჭერენ უკრაინელებს მხარს ყველაზე მეტად! ვფიქრობ, არასდროს არსად ასეთი დამოკიდებულება არ გამოუხატავთ ჩვენ მიმართ, როგორც დღეს საქართველოშია. უნიკალური ქვეყანაა საქართველო!“, – განაცხადა ალექსანდრა სახაროვამ.
როგორ ცდილობენ მოქალაქეები დახმარება გაუწიონ საქართველოში მოხვედრილ უკრაინელ ლტოლვილებს და რა სახის ჰუმანიტარული ტვირთი გროვდება მათთვის, ნახეთ „იმედის კვირის“ რეპორტაჟში.