მდიდარი რუსი ბიზნესმენების შვილები უკრაინაში ომის წინააღმდეგ სოციალურ მედიაში ღიად გამოდიან, ამის შესახებ ამერიკული გამოცემა Fortune წერს. მათ შორის არის 26 წლის სოფია აბრამოვიჩი. “ინსტაგრამზე” მან დაწერა, რომ ომი სურს პუტინს და არა რუსეთს, რიტორიკა კი, რომ ომი რუსეთს სურს, კრემლის პროპაგანდაა.
სოფიას მამა, რომან აბრამოვიჩი საფეხბურთო კლუბ “ჩელსის” მფლობელია. მიუხედავად ბრალდებებისა, ის ამტკიცებს, რომ კრემლთან კავშირი არ აქვს.
ომის მოწინააღმდეგეთა სიაშია კრემლის პრესსპიკერის, დმიტრი პესკოვის შვილიც – ლიზა პესკოვამ “ინსტაგრამის” სტორიში დაწერა ფრაზა #notothewar (“არა ომს”).
უკრაინის მიმართ მხარდაჭერა გამოხატა რუსეთის ყოფილი პრეზიდენტის, ბორის ელცინის შვილიშვილმა და მთავრობის მრჩევლის, ვალენტინ იუმაშევის შვილმა მარია იუმაშევამ. მან დაპოსტა უკრაინის დროშა, წარწერით “არა ომს”. 19 წლის იუმაშევა, ასევე, დაესწრო ომის საწინააღმდეგო აქციას ლონდონში და უკრაინელების მიმართ სოლიდარობა გამოხატა.
ომის შეწყვეტის აუცილებლობაზე განაცხადა 24 წლის ჩოგბურთელმა ანდრეი რუბლოვმაც – მან დუბაიში, მატჩში გამარჯვების შემდეგ დაწერა “არა ომს, გთხოვთ!”
რუსეთში, ომის საწინააღმდეგო აქციებში მონაწილე 4 ათასზე მეტი ადამიანი დააკავეს. გასულ კვირას კი რუსეთის პარლამენტის ჭიშკარზე გაჩნდა წარწერა “არა ომს”.