თბილისის მერიის ორგანიზებით, უკრაინელი ხალხის მხარდასაჭერად, ბელიაშვილის N5-ში გახსნილ ჰუმანიტარული დახმარების პუნქტში პროდუქტების შეგროვების პროცესი მიმდინარეობს. თბილისის მერიის პრესსამსახურის ინფორმაციით, ჰუმანიტარული დახმარების პუნქტში დღეს დედაქალაქის მერი კახა კალაძე, მერის მოადგილე ილია ელოშვილთან ერთად იმყოფებოდა.
თბილისის მერმა უკრაინელ ხალხს მხარდაჭერა კიდევ ერთხელ გამოუცხადა, ქველმოქმედებაში ჩართულ ბიზნესის წარმომადგენლებსა და მოქალაქეებს კი მადლობა გადაუხადა.
„მინდა, ძალიან დიდი მადლობა გადავუხადო ყველა იმ კომპანიას, ვინც ჩართულია ამ პროცესში და გვერდში უდგას უკრაინას და უკრაინელ ხალხს. მინდა, მადლობა გადავუხადო ასევე იმ რიგით მოქალაქეებს, ვინც შესაძლებლობების ფარგლებში მაქსიმალურად გამოხატა მხარდაჭერა. გულწრფელად ვუხდი მადლობას ყველას, რადგან ვიცი, როგორი სოციალური მდგომარეობაა ქვეყანაში, როგორ უჭირს მოსახლეობას და ამის მიუხედავად მოქალაქეები ყველაფერს აკეთებენ იმისთვის, რომ მაქსიმალურად გვერდში დაუდგნენ უკრაინელ დებს და ძმებს. გენაცვალეთ ადამიანობაში, გულში ყველას ამ მხარდაჭერისთვის და თანადგომისთვის.
დღეს, აქ წარმოდგენილია კომპანია „არქის“ მიერ მოტანილი 500 ყუთი. ეს არის საკვები პროდუქტები და ჰიგიენის საშუალებები. ასევე, კომპანია „მაგნიტმა“ წარმოადგინა სხვადასხვა დახმარება, რაც ძალიან მნიშვნელოვანია. ეს ყველაფერი შეგროვდება და უკრაინაში ცენტრალური ხელისუფლების ჩართულობით გაიგზავნება“, – განაცხადა კახა კალაძემ.
მისივე თქმით, დედაქალაქის მთავრობა, ცენტრალურ ხელისუფლებასთან ერთად, უკრაინელი ხალხის მხარდაჭერის მიზნით, არაერთ ჰუმანიტარულ პროგრამას ახორციელებს.
„ჩვენ სხვადასხვა პროექტს ვახორციელებთ. ცენტრალურმა ხელისუფლებამ ითავა საქართველოში ჩარჩენილი უკრაინელების დაბინავება და კვებით უზრუნველყოფა. ჩვენ, ასევე, შევეხიდეთ იმაში, რომ უკრაინის მოქალაქეებს შეუძლიათ უფასოდ ისარგებლონ მუნიციპალური ინფრასტრუქტურით. ეს არის საცურაო აუზები, თეატრები, მუზეუმები, ბიბლიოთეკები, სპორტული ცენტრები. ასევე, უფასოდ იმგზავრონ საზოგადოებრივი ტრანსპორტით. ჩვენ რაც შეგვიძლია, მაქსიმალურად, გვერდით დავუდგებით ჩვენს დებს და ძმებს, თუმცა ყველაზე მთავარი რაც არის – მინდა, მშვიდობა ვუსურვო უკრაინელებს“, – განაცხადა თბილისის მერმა.
ადგილზე ასევე იმყოფებოდა კომპანია „არქის“ დამფუძნებელი ილია წულაია.
როგორც თბილისის მერიის ინფორმაციაშია ნათქვამი, თბილისის მთავრობის გადაწყვეტილებით, გახსნილია ანგარიში უკრაინელი ხალხისთვის ფინანსური დახმარების გასაწევად.
„ანგარიშის სახაზინო კოდია 300778800. ამასთან, თბილისის მუნიციპალიტეტი, უკრაინაში არსებული მდგომარეობის გამო, დედაქალაქში მყოფ უკრაინის მოქალაქეებს ზოგიერთ მუნიციპალურ სერვისს უფასოდ სთავაზობს. საზოგადოებრივ ტრანსპორტში უფასოდ მგზავრობის გარდა, უკრაინის მოქალაქეები უფასოდ ისარგებლებენ მუნიციპალური სპორტული ცენტრების, აუზების, მუზეუმების, თეატრების, ბიბლიოთეკების, მედიათეკებისა და ხელოვნების სკოლების მომსახურებით“,- აღნიშნულია თბილისის მერიის ინფორმაციაში.