უკრაინის ყოფილმა პრეზიდენტმა ვიქტორ იანუკოვიჩმა ვოლოდიმირ ზელენსკის მიმართა და მოუწოდა, შეწყვიტოს სისხლისღვრა ნებისმიერ ფასად.
„მე კარგად მესმის, რომ ბევრი „მრჩეველი“ გყავს, მაგრამ პირადად თქვენ ვალდებული ხართ ნებისმიერ ფასად შეაჩეროთ სისხლისღვრა და მიაღწიოთ სამშვიდობო შეთანხმებას. ეს არის ის, რასაც თქვენგან მოელიან უკრაინაში, დონბასსა და რუსეთში“, – ნათქვამია მიმართვაში, რომელიც „რია ნოვოსტიმ“ გაავრცელა.
იანუკოვიჩის განცხადებით, ასეთი ნაბიჯისთვის უკრაინელი ხალხი და კიევის პარტნიორები დასავლეთში მადლიერი იქნებიან.
„მინდა მივმართო ვოლოდიმირ ზელენსკის, როგორც პრეზიდენტმა ან თუნდაც ცოტა მამობრივად. ვოლოდიმირ ალექსანდროვიჩ, თქვენ ალბათ, ოცნებობთ გახდეთ ნამდვილი გმირი! მაგრამ გმირობა არ არის თავის გამოსაჩენი აქტი, ეს არ არის ბრძოლა უკანასკნელ უკრაინელამდე. ის საკუთარ თავშია – ის არის თავგანწირვაში, საკუთარ სიამაყესა და ამბიციებზე გამარჯვებაში ხალხის სიცოცხლის გადასარჩენად“, – განაცხადა უკრაინის ყოფილმა პრეზიდენტმა.
მან აღნიშნა, რომ ის ტკივილით აღიქვამს იმას, რაც ახლა ხდება მის სამშობლოში და ღრმა თანაგრძნობას უცხადებს იმ ტანჯვას, რომლის ატანასაც უკრაინელებს აიძულებენ. ამასთან, მან ხაზგასმით აღნიშნა, რომ „ნებისმიერი ტრაგედიის დროს არის მომენტი, როდესაც მისი შეჩერება მაინც შეიძლება“.
„პირველივე დღიდან დაპირდი მოსახლეობას უკრაინაში ომის შეწყვეტას და ამიტომ მთელი უკრაინა გიჭერდა მხარს. შეგეძლო გამხდარიყავი მშვიდობის პრეზიდენტი, მაგრამ, სამწუხაროდ, ეს არ მოხდა“, – განაცხადა იანუკოვიჩმა.