აშშ-ის დაზვერვის მაღალჩინოსნები მიიჩნევენ, რომ, სამხედრო წარუმატებლობისა და საერთაშორისო სანქციებით გამოწვეული ეკონომიკური სირთულეების მიუხედავად, ვლადიმერ პუტინმა შესაძლოა, უკრაინაში სამხედრო ესკალაცია გაზარდოს.
ამის შესახებ “ამერიკის ხმა” წერს.
როგორც აშშ-ის ეროვნული დაზვერვის დირექტორმა, ავრილ ჰეინსმა კონგრესში, საერთაშორისო საფრთხის შესახებ სადაზვერვო კომიტეტის ყოველწლიურ მოსმენაზე თქვა, “ჩვენი ანალიტიკოსები მიიჩნევენ, რომ პუტინს ნაკლებად შეაფერხებს ასეთი წარუმატებლობები და შესაძლოა, ესკალაცია გაორმაგდეს უკრაინის განიარაღების მიზნით“.
ჰეინსის თქმით, მაღალი დაძაბულობის პირობებში, ყოველთვის არსებობს “უნებლიე ესკალაციის” ალბათობა.
ამასთანავე, მან აღნიშნა, რომ დაზვერვის ანალიტიკოსებმა ვერ შეამჩნიეს რაიმე ცვლილება რუსეთის ბირთვულ პოლიტიკაში, გარდა იმისა, რაც აღმოჩენილი იყო წინა საერთაშორისო კრიზისების დროს.
ცენტრალური სადაზვერვო სამმართველოს დირექტორმა, უილიამ ბერნსმა განაცხადა, რომ პუტინი ახლა გაცოფებულია.
”ვფიქრობ, ის, სავარაუდოდ, გააორმაგებს ფსონებს, შეეცდება, გაანადგუროს უკრაინის არმია და ყურადღებას არც მიაქცევს მსხვერპლს მშვიდობიან მოსახლეობაში,” – თქვა ბერნსმა.
მანვე აღნიშნა, რომ შეერთებული შტატები და უკრაინა აქტიურად ცვლიან სადაზვერვო ინფორმაციას.