დიდი ბრიტანეთის პრემიერმინისტრის, ბორის ჯონსონის განცხადებით, უკრაინაში დამარცხების შემთხვევაშიც კი, რუსეთთან ნორმალური ურთიერთობების დაბრუნება შეუძლებელია.
მისი აზრით, უკრაინაში მარცხი კრემლს პროგნოზირებადს და დემოკრატიულს ვერ გახდის.
ამის შესახებ მან PAP-თან ინტერვიუში განაცხადა.
კითხვაზე, რამდენი ხანი იქნება რუსეთი მსოფლიოსგან იზოლირებული, ჯონსონმა თქვა, ”რუსეთმა, უკრაინაზე თავდასხმით, დაარღვია საერთაშორისო სამართლის ფუნდამენტური პრინციპები და მე ვერ ვხედავ ნორმალურ ურთიერთობებში დაბრუნების შესაძლებლობას. ჩვენი ამოცანა არ არის რუსეთის შეცვლა, ან მითითება, თუ როგორი უნდა იყოს რუსეთი. ჩვენი ამოცანაა – უზრუნველვყოთ ჩვენი ერთობა და გავუწიოთ წინააღმდეგობა რუსეთის აგრესიას, დავეხმაროთ უკრაინას და რომ პუტინი ამ მცდელობაში დამარცხდეს”.
ბრიტანეთის პრემიერის თქმით, „ჩვენ უნდა გავაკეთოთ ისე, რომ პუტინი დარჩეს პოლიტიკურად იზოლირებული, რომ მასზე იყოს ეკონომიკური ზეწოლა და ჩვენ გავაგრძელოთ უკრაინის ამჟამინდელი მხარდაჭერა“.