უკრაინისათვის პოლონური MiG-29-ის მიწოდებაზე უარის თქმის გადაწყვეტილება პირადად აშშ-ის პრეზიდენტმა, ჯო ბაიდენმა მიიღო. ინფორმაციას ამის შესახებ ამერიკული გაზეთი The Wall Street Journal-ი ავრცელებს.
გაზეთის ინფორმაციით, ჯო ბაიდენმა პირადად დაადო ვეტო უკრაინისათვის საბრძოლო თვითმფრინავების მიწოდებას, რათა რუსეთის პრეზიდენტის, ვლადიმერ პუტინის პროვოცირება არ მოეხდინა.
„როგორც ჩანს, ლოგიკა იმაში მდგომარეობს, რომ ლეტალური საზენიტო და ტანკსაწინააღმდეგო იარაღის გაგზავნა არ გამოიწვევს რუსეთის პროვოცირებას, თუმცა 28 საბრძოლო თვითმფრინავის გაგზავნა – გამოიწვევს. ეს განსხვავება რთულად გასაანალიზებელია, განსაკუთრებით მაშინ, როდესაც პენტაგონი ასევე ამბობს, რომ უკრაინელებს არ სჭირდებათ თვითმფრინავები, რადგან მათი სხვა იარაღი უფრო ეფექტურია. ასე რომ, ნაკლებად ლეტალური თვითმფრინავის გაგზავნა გამოიწვევს მესამე მსოფლიო ომს, მაგრამ არა იმ იარაღის, რომელიც მართლაც ლეტალურია?“ – წერს გაზეთი სარედაქციო სტატიაში.
გაზეთი The Wall Street Journal-ი ხაზგასმით აღნიშნავს, რომ ამგვარი გადაწყვეტილება დიდი პრობლემაა და პუტინს ნატოს შესახებ გარკვეულ სიგნალს უგზავნის.
„საიმედო შეკავების არსი ის არის, რომ მოწინააღმდეგემ უნდა დაიჯეროს, რომ მისი გარკვეული ქმედებები რეაგირებას გამოიწვევს. როდესაც თვითმფრინავებს დემონსტრატიულად არ აგზავნი და აცხადებ, რომ ამის მიზეზი ესკალაციისადმი შიშია, ამით ბაიდენი პუტინს ეუბნება, რის გამო არ უნდა ინერვიულოს მან. პუტინის შეკავების ნაცვლად ბაიდენი რუსებს აშშ-ის შეკავების საშუალებას აძლევს. პუტინმა იცის, რას არ გააკეთებს ნატო მის შესაჩერებლად“, – წერია სტატიაში.
10 მარტს, პენტაგონის ოფიციალურმა წარმომადგენელმა, ჯონ კირბიმ განაცხადა, რომ აშშ ამ ეტაპზე უკრაინისთვის საბრძოლო თვითმფრინავების გადაცემას მხარს არ უჭერს.
„თავდაცვის მდივანმა ხაზგასმით აღნიშნა, რომ ჩვენ არ ვუჭერთ მხარს უკრაინის საჰაერო ძალებისთვის დამატებითი გამანადგურებელი თვითმფრინავების გადაცემას“, – აღნიშნა ჯონ კირბიმ.
ჯონ კირბის თქმით, დაზვერვის შეფასების თანახმად, MiG-29-ის უკრაინაში გადაცემა შეიძლება შეცდომით ჩაითვალოს ესკალაციად, რამაც შეიძლება გამოიწვიოს რუსეთის მნიშვნელოვანი რეაქცია და გაზარდოს ნატოსთან სამხედრო ესკალაციის პერსპექტივები.
აშშ ასევე მიიჩნევს, რომ უკრაინის მხარდაჭერის საუკეთესო საშუალება იარაღისა და სისტემების მიწოდებაა, რომელიც მათ ყველაზე მეტად სჭირდებათ რუსული აგრესიის დასამარცხებლად, კერძოდ, ტანკსაწინააღმდეგო და საჰაერო თავდაცვის საშუალებები.