საგარეო საქმეთა სამინისტროს ორგანიზებით, 13 მარტს, საქართველოში, სახმელეთო გზით დაბრუნდა საქართველოს რუმინეთში მყოფი 40-მდე მოქალაქე. დღეს რუმინეთიდან, დამატებით, საქართველოს 50 მოქალაქე გამოემგზავრება, მიმდინარე კვირას ასევე დაგეგმილია მოქალაქეთა ორგანიზებული გამომგზავრება პოლონეთიდან, საიდანაც, სახელმწიფოს დახმარებით, საერთო ჯამში, საქართველოს 150-მდე მოქალაქე დაბრუნდება სამშობლოში.
„ასევე, გრძელდება მოქალაქეთა ორგანიზებული გამოყვანა უკრაინის ტერიტორიიდან მის მოსაზღვრე სახელმწიფოებში, კერძოდ, ქალაქი ლვოვიდან ქალაქ ვარშავას მიმართულებით, ავტობუსის დამატებითი რეისები შესრულდება 15 და 16 მარტს, ამ დროისთვის, საერთო ჯამში, ლვოვიდან ვარშავის მიმართულებით, სახელმწიფოს ძალისხმევით, საქართველოს 500-მდე მოქალაქე იქნა გამოყვანილი. მოქალაქეთა ორგანიზებული გამოყვანა ხდება ოდესიდან, საქართველოს გენერალური საკონსულოს მიერ. უკრაინიდან ევაკუირებულ საქართველოს მოქალქეებს უკრაინის მოსაზღვრე სახელმწიფოებში საქართველოს საელჩოები უწევენ პირველადი საჭიროების დახმარებას, რის შემდეგაც, საქართველოში მოემგზავრებიან. საქართველოს მთავრობის დავალებით, საქართველოს საელჩო უკრაინაში, გენერალური საკონსულო ოდესაში და საკონსულო პუნქტი ლვოვში, განაგრძობენ საგანგებო რეჟიმში მუშაობასა და საქართველოს მოქალაქეების დახმარებას“, – აღნიშნულია უწყების განცხადებაში.
საგანგებო რეჟიმში მუშაობენ უკრაინის მოსაზღვრე ქვეყნებში – რუმინეთში, პოლონეთში, მოლდოვაში, სლოვაკეთსა და უნგრეთში საქართველოს დიპლომატიური წარმომადგენლობები.
„ისინი ახორციელებენ მოქალაქეთა გადაყვანას უკრაინიდან მოსაზღვრე ქვეყნებში და შემდგომ მათ საქართველოში გამომგზავრებას. ამ დროისთვის, უკრაინიდან სხვადასხვა ქვეყნის გავლით, საქართველოში ორგანიზებულად, სახელმწიფოს დახმარებით, დაბრუნდა 1600-მდე მოქალაქე“, – აღნიშნულია საგარეო უწყების განცხადებით.