ქვეყანაში ეპიდემიოლოგიური სიტუაცია სტაბილურია. დადებითობის მაჩვენებელთან ერთად, შემცირდა გარდაცვლილთა რაოდენობაც. თუმცა, საყურადღებოა მსოფლიოში გამოჩენილი კოვიდის ახალი მუტაცია, ე.წ. „დელტამიკრონი” რომელიც არსებული ინფორმაციით, „დელტასა“ და „ომიკრონის“ თვისებებით ხასიათდება. საბედნიეროდ, მსოფლიოს მასშტაბით ახალი შტამის მცირე რაოდენობაა დადასტურებული, რის საფუძველზეც მედიკოსები ამბობენ, რომ მსოფლიოში არ არსებობს პანიკისა და შიშის საფუძველი.
„ბოლო დღეებში ამერიკის და ევროპის ქვეყნებში დაფიქსირებულია ახალი შტამი, ე.წ. დელტამიკრონი, მაგრამ ჯერჯერობით დაფიქსირებულია მხოლოდ 17 დადასტურებული შემთხვევა და ისიც ამერიკასა და ევროპის ზოგიერთ ქვეყნებში. რაიმე ცნობა ამ შტამით ინფიცირების მატებაზე არ არის, შესაბამისად, არ არსებობს არავითარი საფუძველი პანიკის და იმისი, რომ მსოფლიოში და საქართველოშიც დაიწყოს ახალი ტალღა. მოსახლეობა უნდა იყოს მშვიდად, მაგრამ ფხიზლად. დავიცვათ სიფრთხილის ის მინიმალური ზომები და რეგულაციები, რომელიც დარჩენილია“, – განაცხადა თბილისის ინფექციური საავადმყოფოს დირექტორმა, თენგიზ ცერცვაძემ.