პარლამენტის მხრიდან უკრაინაში გაგზავნილ ჰუმანიტარულ დახმარებაში „ნაციონალურ მოძრაობისა“ და „ლელოს“ წარმომადგენლებს მონაწილეობა არ მიუღიათ, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებთან განაცხადა.
მისი თქმით, ოპოზიციის ამ ნაწილის წარმომადგენლებისგან არც ერთი თეთრი არ შესულა პარლამენტში გახსნილ სპეციალურ ანგარიშზე.
როგორც პაპუაშვილმა აღნიშნა, რაც შეეხება უკრაინის რეალურ დახმარებას და გვერდში დგომას, ოპოზიციის წარმომადგენლები სწორედ მაშინ არ იჩენენ არანაირ დახმარებას.
„უკვე სამი კვირაა, რაც უკრაინა რუსული აგრესიის ქვეშ არის და ამ დღეების განმავლობაში რასაც ვხედავთ ჩვენი ოპოზიციის ნაწილის მხრიდან, განსაკუთრებით ეს შეეხება „ნაციონალურ მოძრაობას“ და „ლელოს“ მცდელობას, რომ მოხდეს აქ ისტერია, მოხდეს ის, რაზეც ვსაუბრობთ და სამწუხაროდ, ყველა ეს ნიშანი დასტურდება მათი ქმედებით, რომ რამენაირად არიონ აქ სიტუაცია, ჩაითრიონ საქართველო ისეთ რამეში, რაც გამოუსწორებელი იქნება. რაც შეეხება ოპოზიციის ამ ნაწილის ინიციატივებს, ჩვენ არც კი შევდივართ ამ ინიციატივების განხილვაში, იქიდან გამომდინარე, რომ ჩვენ ვხედავთ, რა არის ამის მიზანი, რაც არა ერთხელ აღგვინიშნავს, რომ ეს არის ქვეყანაში არეულობა და მისი ჩათრევა ომში, შეიარაღებულ კონფლიქტში. ჩვენ ამას არ დავუშვებთ.
რაც შეეხება გულწრფელ სურვილებს და დამოკიდებულებებს, იცით, რომ ცოტა ხნის წინ, პარლამენტის მხრიდან გავაგზავნეთ უკრაინაში ჰუმანიტარული დახმარების პირველი პარტია. ეს იყო შეგროვებული თანხები პარლამენტის წევრებისა და აპარატის თანამშრომლების მხრიდან, მაშინაც არ მიუღია ოპოზიციის ამ ნაწილს მონაწილეობა. ამასთან, რამდენჯერმე განვაცხადე, რომ გახსნილი გვაქვს სპეციალური ანგარიში, სადაც ყველას მოვუწოდებთ, თუკი რამე ახლა სჭირდება უკრაინას, განსაკუთრებით ჩვენი მხრიდან, ეს არის დახმარება, დახმარება მშვიდობიანი მოსახლეობის, დახმარება სხვადასხვა საშუალებებით, რაც შეგვიძლია, რომ გავიღოთ. ამ ოპოზიციის წარმომადგენლების მხრიდან არც ერთი თეთრი არ შემოსულა პარლამენტის სახელით ამ ჰუმანიტარული დახმარების გასაგზავნად. ასე რომ, აქ ჩანს სინამდვილეში, რა არის რეალური განზრახვა ოპოზიციის ამ ნაწილის. ეს არის მხოლოდ პიარი, უხეშად რომ ვთქვათ. რაც შეეხება რეალურ დახმარებას და გვერდში დგომას, მაშინ სწორედ ისინი არ იჩენენ არანაირ დახმარებას.
მათ შორის იცით, რომ ჩვენ გვქონდა სისხლის დონაციის კამპანია და ამ კამპანიაშიც, აღნიშნა კიდეც დიმიტრი ხუნდაძემ, რომელიც ამას კურირებდა, რომ შეიძლება ითქვას, ერთ ხელზე ჩამოსათვლელად იყვნენ ოპოზიციიდან აქ ჩართული. თუკი ვინმეს რეალურად სურს, დაუდგეს გვერდში უკრაინას, დაუდგეს საქმით და არა ხმამაღალი განცხადებებით და საბოლოო ჯამში, ასეთი ისტერიით“, – განაცხადა შალვა პაპუაშვილმა.