დღეს შემიძლია, განვაცხადო, რომ ამჟამად არსებული ინფორმაციის საფუძველზე, აშშ-ის მთავრობის შეფასებით, რუსეთის შეიარაღებული ძალების წევრებმა ჩაიდინეს სამხედრო დანაშაულები უკრაინაში, – ამის შესახებ აშშ-ის სახელმწიფო მდივნის, ენტონი ბლინკენის განცხადებაშია ნათქვამი.
ენტონი ბლინკენის განცხადებით, მშვიდობიანი მოსახლეობის მიზანმიმართულად სამიზნეში ამოღება სამხედრო დანაშაულია.
„მე ხაზგასმით აღვნიშნე, რომ სახელმწიფო დეპარტამენტი და აშშ-ის მთავრობის სხვა ექსპერტები უკრაინაში პოტენციური სამხედრო დანაშაულების დოკუმენტირებასა და შეფასებას აწარმოებენ“, – აცხადებს ენტონი ბლინკენი.
მისივე თქმით, აშშ-ის მთავრობის შეფასება ეფუძნება საჯარო და დაზვერვის წყაროებიდან არსებული ინფორმაციის ყურადღებით განხილვას.
„აშშ-ს მთავრობა გააგრძელებს სამხედრო დანაშაულების შესახებ ანგარიშების თვალყურის დევნებას და საჭიროებისამებრ გავუზიარებთ ჩვენ მიერ შეგროვებულ ინფორმაციას მოკავშირეებს, პარტნიორებს და საერთაშორისო ინსტიტუტებსა და ორგანიზაციებს. ჩვენ მივისწრაფით პასუხისგებისკენ, ყველა ხელმისაწვდომი ინსტრუმენტის, მათ შორის, სისხლისსამართლებრივი დევნის გამოყენებით“, – ნათქვამია სახელმწიფო მდივნის განცხადებაში.