საჩხერეში არქეოლოგიური სამარხი გაძარცვეს

“საჩხერეში არქეოლოგიური სამარხი გაძარცვეს“, – ამის შესახებ ინფორმაციას გაზეთი „პრაიმტაიმი“ ავრცელებს.
როგორც გამოცემა დღევანდელ ნომერში წერს, საქართველოში შავი არქეოლოგიის მასშტაბური სქემა გამოვლინდა. კერძოდ, საჩხერის რაიონში 100-მდე უძველესი ექსპონატი არქეოლოგიური წესით უკანონოდ მოიპოვეს. საუბარია ოქროსა და ვერცხლის ანტიკური ხანის ექსპონატებზე, რომელთა ღირებულება შავ ბაზარზე შესაძლოა, მილიონებს აჭარბებდეს.
არსებული ინფორმაციით, ეს ნივთები არაუფლებამოსილმა პირებმა საჩხერეში კანონდარღვევით მოიპოვეს და შემდგომ დაეუფლნენ. უცნობია, რა პერიოდშია ამოღებული მიწიდან ძვირფასეულობა. ძვირად ღირებული ექსპონატები ამ დროისთვის ეროვნული მუზეუმის საცავში ინახება და საქმეზე მოკვლევა მიმდინარეობს.
აღნიშნული ინფორმაცია „პრაიმტაიმს“ კულტურის მინისტრის მოადგილე ლევან ხარატიშვილმაც დაუდასტურა.
გამოცემისთვის, არაოფიციალურად ხდება ცნობილი, რომ ძვირფასი ლითონისგან დამზადებული უძველესი ნივთები რამდენიმე პირმა ეროვნულ მუზეუმში თავად მიიტანა იმ იმედით, რომ ნივთებს შეაფასებინებდნენ და შემდეგ გაყიდდნენ. თუმცა მათი გეგმა ჩავარდა, სავარაუდოდ, კანონის არცოდნის გამო. ძვირად ღირებული ექსპონატები ეროვნულ მუზეუმში დარჩა, მათი მომპოვებლის წინააღმდეგ კი გამოძიება დაიწყო.
როგორც სტატიაში წერია, სად და როგორ მოიპოვეს უძველესი ნივთები, ეს ჯერჯერობით ზუსტად დადგენილი არ არის. სტატიის თანახმად, არაოფიციალური ვერსიით კი, ძვირფასეულობა საჩხერეში ერთ-ერთი გლეხის ყანაში აღმოჩნდა, თუმცა ამ ინფორმაციის სანდოობაში ექსპერტებს ეჭვი შეაქვთ, რადგან ნივთების რაოდენობიდან და მისი სიძველიდან გამომდინარე, სავარაუდოდ, გაძარცულია არქეოლოგებისთვის აქამდე უცნობი სამარხი. გამოცემის ინფორმაციით, აღნიშნულ საქმეზე მიმდინარეობს მოკვლევა. როგორც ირკვევა, საქმის ბოლომდე შესწავლას ელოდებიან კულტურისა და ძეგლთა დაცვის სამინისტროშიც.