მცხეთასთან მომხდარი ავარიის შედეგად დაშავებული 5 ადამიანიდან ორის ჯანმრთელობის მდგომარეობა მძიმეა.
ექიმის, ილია ოქროჯანაშვილის თქმით, პაციენტები ამ დროისთვის მკურნალობას კლინიკაში აგრძელებენ.
“ორის მდგომარეობა არის უკიდურესად მძიმე. ერთი იმყოფება მართვით სუნთქვაზე რეანიმაციაში, მეორე პაციენტის მდგომარეობა არის სტაბილური, საყურადღებო, მიმდინარეობს კვლევები”, – აღნიშნა ექიმმა.
შეგახსენებთ, მცხეთასთან მომხდარ ავარიას ერთი ადამიანის სიცოცხლე ემსხვერპლა, 5 ადამიანი კი დაშავდა. მიკროავტობუსი, რომელშიც რამდენიმე მგზავრი იმყოფებოდა, ჯებირს შეეჯახა, რის შემდეგაც ცეცხლი გაუჩნდა. შემთხვევა გუშინ მოხდა.
მომხდართან დაკავშირებით გამოძიება სსკ-ის 276-ე მუხლის მე-6 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.