ჩეხეთის ქალაქ ბრნოს მასარიკის უნივერსიტეტში 30 მაისს გაიხსნა რუსათველის კაბინეტი, რომლის მიზანსაც წარმოადგენს ქართულ-ჩეხური კულტურული, საგანმანათლებლო და სამეცნიერო ურთიერთობების გაღრმავება.
ჩეხეთის საუნივერსიტეტო სივრცეში რუსთაველის კაბინეტის ამოქმედება შესაძლებელი გახდა ბრნოს მასარიკის უნივერსიტეტს, საქართველოს რუსთაველის ეროვნულ სამეცნიერო ფონდსა და ჩეხეთში საქართველოს საელჩოს შორის გაფორმებული მემორანდუმის შედეგად.
„ჩვენ ვფიქრობთ, რომ კონკრეტული პროექტები უნდა განხორციელდეს, რომლებიც გაზრდის ცნობადობას საქართველოზე და ერთმანეთთან დააკავშირებს მეცნიერებს, რომლებიც არა მხოლოდ შუა საუკუნეებს, არამედ ზოგადად სწავლობენ საქართველოს. ინტერესი მაღალია. არსებობს ევროკავშირის ფონდები, რომლებთანაც წვდომას გაუხსნის გზას მასარიკის უნივერსიტეტთან თანამშრომლობა. და ვფიქრობ, რომ ძალიან საინტერესო პროექტების მომსწრენი გავხდებით მომავალში“, – განაცხადა მარიამ რაქვიაშვილმა, საქართველოს საგანგებო და სრულუფლებიანმა ელჩმა ჩეხეთის რესპუბლიკაში.
რუსთაველის კაბინეტმა ბინა დაიდო მასარიკის უნივერსიტეტის შუა საუკუნეების კათედრაზე, სადაც პროფესორ ივან ფოლეტის ხელმძღვანელობით უკვე მიმდინარეობს ქართული ქრისტიანული არქიტექტურის, როგორც ევროპული კულტურული სივრცის ნაწილის, შესწავლა.
მასარიკის უნივერსიტეტი წამყვანი და სიდიდით მეორე უნივერსიტეტია ჩეხეთის რესპუბლიკაში. ის დაარსდა 1919 წელს და ამჟამად უნივერსიტეტში სწავლობს 35000 სტუდენტი.