ბავშვთა დაცვის საერთაშორისო დღესთან დაკავშირებით, ნაძალადევის რაიონის გამგეობამ გასართობი ღონისძიება ვეტერანთა კულტურისა და დასვენების (კიკვიძის) პარკში გამართა.
ღონისძიებას ნაძალადევის რაიონის გამგებელი ირაკლი ანდღულაძე დაესწრო.
„ყველა პატარას ვულოცავ ბავშვთა დაცვის საერთაშორისო დღეს, ვუსურვებ ლაღ ბავშვობას და ბედნიერ მომავალს. ამ დღის აღსანიშნავად კიკვიძის პარკში გასართობი ღონისძიება გავმართეთ. ნაძალადევის რაიონში რეგისტრირებული ბაღების აღსაზრდელებმა მრავალფეროვანი საკონცერტო ნომრები წარმოგვიდგინეს. მთელი დღის განმავლობაში მხიარული განწყობა იყო, საღამო კი კონცერტით დასრულდა“, – განაცხადა ირაკლი ანდღულაძემ.
პატარების სადღესასწაულო განწყობაზე მულტფილმის გმირებმა, ჯამბაზებმა და სახის მომხატველებმა იზრუნეს. ასევე, ბავშვებისთვის მოეწყო სხვადასხვა სპორტული და სახალისო აქტივობა.
ასევე, ნაძალადევის რაიონის გამგეობის დაფინანსებით, ასოციაცია ,,ანიკა“-ში განსაკუთრებული შესაძლებლობების ბავშვებისთვის თოჯინების წარმოდგენა გაიმართა.