თბილისში, კეკელიძის ქუჩის პირველ ნომერში აღსრულების პოლიცია ერთი ოჯახის გამოსახლებას ცდილობს. ადგილზე დაპირისპირება მას შემდეგ დაიწყო, რაც უწყების თანამშრომლებმა კორპუსში რკინის საჭრელი სპეციალური დანადგარი შეიტანეს.
როგორც ადგილიდან რადიო თავისუფლების ჟურნალისტი იუწყება, აღსრულების სამსახური ცდილობს რკინის კარის გაჭრას და ბინაში ასე შესვლას.
კორპუსთან რამდენიმე ათეული ადამიანია მისული, ისინი ცდილობენ აღსრულების პოლიციას ხელი შეუშალონ გამოსახლების პროცესში. მოქალაქეთა ნაწილი კეკელიძის ქუჩის გადაკეტვას ცდილობს და გზის სავალ ნაწილზე ზის.
“აქ მევახშე ასახლებს 3 თვის ბავშვს” – ამ შინაარსის წარწერა გამოაკრეს მათ იმ ბინაზე, რომლიდანაც ოჯახის გამოსახლებას ცდილობენ.
ოჯახის მოთხოვნაა, მათ მისცენ დრო. როგორც ოჯახის ერთ-ერთი წევრი რადიო თავისუფლების ჟურნალისტს უყვებოდა, მათ ამ ბინით ერთ-ერთ ბანკში 2008 წელს იპოთეკური სესხი აიღეს, 2013 წლამდე იხდიდნენ თანხას, თუმცა მოგვიანებით ბანკის თანამშრომლებმა ურჩიეს, რომ კერძო მევახშესთან გაეგრძელებინა თანამშრომლობა. როგორც ამ ბინის ერთ-ერთი მაცხოვრებელი ამბობდა, პრობლემები მევახშესთან სესხის აღების შემდეგ დაიწყო და სწორედ მისი მოთხოვნით გაუყიდეს ბინა.