ქვეყნის ევროპული პერსპექტივა აღიარებულია. ბრიუსელის შემდეგ პროცესი საქართველოში ინაცვლებს. გზა ევროპულ ოჯახამდე – საგზაო რუკა ცნობილია. პირობები კი, რომელიც ქვეყანამ ევროკავშირის წევრობის კანდიდატის სტატუსის მისაღებად უნდა შეასრულოს ევროკომისიამ 12 პუნქტში გაწერა. პროგრესი წლის ბოლოს შეჯამდება.
ევროკომისიის მიერ მიღებულ გადაწყვეტილებას აფასებენ ქართულ პოლიტიკურ სპექტრში და იმ პირობების შესრულების შესაძლებლობაზე საუბრობენ, რომელიც ევროპამ საქართველოს დაუსახა.
“სტრატეგია აღმაშენებლის” წევრი პაატა მანჯგალაძე მიიჩნევს, რომ ეროვნული თანხმობის მთავრობის არსებობის შემთხვევაში პირობების შესრულება 3 თვეში იქნებოდა შესაძლებელი.
“ჩვენ, ოპოზიცია, რომ ვყოფილიყავით ახლა ხელისუფლებაში და ამხელა მარცხი მიგვეღო საერთაშორისო ასპარეზზე, ეს ნამდვილად იქნებოდა პასუხისმგებლობის საკითხი. დემოკრატიის მმართველობის ფორმაა ქუჩაში აქციაზე გამოსვლა ხალხის. უნდა გამოვიდეთ ძალიან ბევრი, ხელისუფლებამ რომ იგრძნოს, რომ ხალხის ნებას ასცდა. მიუხედავად მათი ბუნებისა, რომ არ უნდა ენდო მათ. მაინც მზად ვართ, ქვეყნის ინტერესებიდან გამომდინარე შანსი მივცეთ ერთმანეთს და დავიწყოთ მოლაპარაკების პროცესი ევროინტეგრაციის გზასთან დაკავშირებით,” – განაცხადა პაატა მანჯგალაძემ.