მე ვფიქრობ სამართლიანი და სწორი იქნება, თუ ორივე ქვეყნის [საქართველოს და მოდლოვას] მიმართ იქნება ერთნაირი მიდგომა და გადაეცემათ კანდიდატის სტატუსი, მაგრამ პირობების გათვალისწინებით, – ამის შესახებ ევროპარლამენტარმა მარინა კალიურანდიმ განაცხადა.
„ჩემი პერსონალური პოზიციაა, რადგან კანდიდატის სტატუსის განხილვა ხდება უკრაინაში ომის გამო, უკრაინას სჭირდება ამ პროცესში განსაკუთრებული დამოკიდებულება. უკრაინას სჭირდება ძალიან ძლიერი პოლიტიკური მხარდაჭერა, კანდიდატის სტატუსი ყოველგვარი პირობების და კითხვების გარეშე. უკრაინას კანდიდატის სტატუსი უნდა თვეების წინ მიეღო. დიდი ბოდიში, რომ უკრაინამ ვერ მიიღო სამი თვის წინ. უკრაინამ უნდა მიიღოს სტატუსი პირობების გარეშე და განსაკუთრებული მიდგომით. რაც შეეხება საქართველოსა და მოლდოვას, მე ვფიქრობ სამართლიანი და სწორი იქნება, თუ ორივეს მიმართ იქნება ერთნაირი მიდგომა და გადაეცემათ კანდიდატის სტატუსი, მაგრამ პირობების გათვალისწინებით“, – განაცხადა კალიურანდიმ.