“ბავშვს უტარდებოდა პედიატრიულ-უროლოგიური ოპერაცია შარდსადენ მილზე. საწყისი ნარკოზის ჩატარების შემდეგ, რამდენიმე წუთში განვითარდა სუნთქვის დარღვევა, გულის რიტმის დარღვევა და გულის გაჩერება”, – ამის შესახებ მანაგაძის კლინიკის სამედიცინო დირექტორი, ამბროსი პერტია 7 წლის ბავშვის გარდაცვალებაზე საუბრისას აცხადებს.
მისივე თქმით, მცირეწლოვნის გარდაცვალების მიზეზს ექსპერტიზა დაადგენს.
“სიკვდილის კონკრეტული მიზეზი დადგინდება მხოლოდ და მხოლოდ ექსპერტიზის შედეგად. ყველა სამედიცინო კვლევა იყო ჩატარებული ნარკოზის სახეობის შესახებ, ეს იყო უკვე მესამე ჩარევა ამ პრობლემაზე, რამდენიმე წლის წინ ჩატარდა კიდევ ერთი, ოღონდ ის ჩატარდა ანესთეზიის სხვა სახეობით”, – განაცხადა პერტიამ.
ცნობისთვის, თბილისში, მანაგაძის სახელობის კლინიკაში 7 წლის გიორგი დემურია გარდაიცვალა. გარდაცვლილი ბიჭის დედა მომხდარში ექიმებს ადანაშაულებს.