„დღეს რუსთავში ძალიან სამწუხარო რეალობაა – „ნაციონალური მოძრაობა“, სხვა ოპოზიციურ პარტიასთან ერთად, მოწადინებულია, რომ რაც შეიძლება მეტად შეაფერხოს ის პროცესი, რომელიც ქალაქში მიდის. გულწრფელად შემიძლია ვთქვა, რომ ამას თითოეული რუსთაველი ხედავს“, – განაცხადა რუსთავის მერმა, ნინო ლაცაბიძემ რუსთავის საკრებულოში.
მერის თქმით, ოპოზიცია ცდილობს, ხელოვნურად შეაფერხოს პროცესები, რომელიც ქალაქის მოსახლეობისთვის მნიშვნელოვანია.
„ძალიან ბევრი გამოწვევის, ბევრი პრობლემის მიუხედავად, დღეს უპრეცედენტოდ მნიშვნელოვანი და ბევრი პროექტი ხორციელდება ჩვენს ქალაქში. ჩემთვის, ოპოზიციური პარტიების არცერთი პრინციპი არ იქნება უკანდასახევი – როდესაც [საქმე] ჩემს ქალაქს ეხება, ყველგან მივალ და ყველა კარს შევაღებ. დააყენეს საკითხი, რომ საკითხებს არ გაიტანდნენ, თუ მერი არ დაესწრებოდა. დღეს მეც მივედი, თუმცა, მათი მხრიდან, არცერთი კითხვა, რომელიც მოქალაქესა და ჩვენს ქალაქს ეხება, არ დასმულა“, – განაცხადა ნინო ლაცაბიძემ.
რუსთავის საკრებულოში ხმაური იყო. რიგგარეშე სხდომაზე რუსთავის მერი მივიდა. ნინო ლაცაბიძემ მზადყოფნა გამოთქვა ოპონენტების კითხვებისთვის ეპასუხა. სხდომაზე „ნაციონალური მოძრაობის“ დეპუტატები მერს რამდენჯერმე დაუპირისპირდნენ და დასმულ კითხვებზე პასუხის გაცემის საშუალებას არ აძლევდნენ.