“უტიფრობისა და თავხედობის მწვერვალია, როდესაც ბატონი გახარია აგვისტოს ომის დროს მოსკოვში კითხულობდა ლექციებს“

მმართველ გუნდში ყოფილი პრემიერის, გიორგი გახარიას განცხადებას ეხმაურებიან, რომელმაც პოლიტიკურ სპექტრს ერთიანობისკენ მოუწოდა.

„ქართულ ოცნებაში“ პარტია „საქართველოსთვის“ ლიდერს შეახსენეს, რომ აგვისტოს ომის პარალელურად ის მოსკოვში საქმიანობდა და ოკუპანტი ქვეყნის უნივერსიტეტში საგანმანათლებლო საქმიანობას ეწეოდა.

„2008 წლის აგვისტოს ომში უდავოდ ვნახეთ ჩვენი გმირი მებრძოლების თავდადება და ხალხის ერთობა. თუმცა, საინტერესოა რა ერთიანობაზე ლაპარაკობს გახარია, როდესაც მაშინდელი ხელისუფლების წარმომადგენლები და მოღალატე პოლიტიკოსები ერთმანეთს ასწრებდნენ სადახლოსთან და წითელ ხიდთან. უტიფრობისა და თავხედობის მწვერვალია, როდესაც ბატონი გახარია მაშინ მოსკოვის ერთ-ერთ უნივერსიტეტში კითხულობდა ლექციებს და საუბრობს თითქოს ერთ მუშტად შეკრული რუსეთის ოკუპაციისგან იცავდა საქართველოს“, – განაცხადა საპარლამენტო უმრავლესობის წევრმა რატი იონათამიშვილმა.

გიორგი გახარია პოლიტიკურ სპექტრს ერთიანობისკენ მოუწოდებს და ამბობს, რომ ქვეყნის უსაფრთხოებისთვის მტერთან საბრძოლველად ისე უნდა გაერთიანდნენ, როგორც 2008 წლის აგვისტოს ომის დროს.