საქართველოს პარლამენტის თავმჯდომარის შალვა პაპუაშვილის განცხადებით, სხვადასხვა ქვეყნის პარლამენტის თავმჯდომარეებსა და მოადგილეებთან შეხვედრისას საუბრის ძირითადი საკითხები საქართველოს ოკუპირებულ ტერიტორიებს უკავშირდებოდა.
როგორც პაპუაშვილი ამბობს, საქართველოს მიმართ სოლიდარობა არის მყარი.
„დღეს შვიდი ქვეყნის პარლამენტის თავმჯდომარეებსა და მოადგილეებს შევხვდით. ჯამში, გუშინ და დღეს 12 ქვეყნის წარმომადგენელს შევხვდით. შეხვედრები ხვალ ისევ გაგრძელდება. მთავარი არის ერთი რამ – განსაკუთრებით ახლა, როცა მსოფლიოს ყურადღება მთლიანად მიპყრობილია იმ საკითხზე, რომ ტერიტორიული მთლიანობის დარღვევა ფუნდამენტური საერთაშორისო პრინციპების საწინააღმდეგო ქმედებაა, აგრესია არის მიუღებელი, ეს საქართველოს მდგომარეობაზეც მეტ ყურადღებას იწვევს და ყველასთვის გასაგებია, რომ ოკუპაციას, რომელიც საქართველოში მიმდინარეობს, მნიშვნელოვანია, შეეწინააღმდეგოს ყველა საერთაშორისო ინსტრუმენტით. მნიშვნელოვანია, რომ საქართველოს რეზოლუციებში ჰქონდეს მხარდაჭერა.
შესაბამისი ქვეყნების წარმომადგენლებთან საუბარი გვქონდა იმ საკითხზე, რომ ჩვენთვის მნიშვნელოვანია გაერო-ს გენერალურ ასამბლეაზე რეზოლუციისთვის მხარდაჭერა, რომლის მიღებაც ყოველ წელს განახლებული სახით ხდება. მნიშვნელოვანია, ამ რეზოლუციას რაც შეიძლება მეტი მხარდაჭერა ჰქონდეს. ჩვენ ასეთი დაპირება კოლეგებისგან მივიღეთ. საბოლოო ჯამში, შეიძლება ითქვას, რომ საქართველოს მიმართ სოლიდარობა არის მყარი. რაც შეეხება რუსეთის მხრიდან საქართველოს ტერიტორიების ოკუპაციას, ლტოლვილების საკითხს, ამ მხრივ მხარდაჭერა არის უზრუნველყოფილი“, – განაცხადა შალვა პაპუაშვილმა.