ცოტა თავი მოთოკონ ამ ჩემმა ოპოზიციონერმა კოლეგებმა, ეს ბოდვა საიდან მოიტანეს?! – მითხარით, ვინ არის „ქართული ოცნების“ კანდიდატი და საჯაროდ გეუბნებით, იმას მხარს არ დავუჭერ, – ასე გამოეხმაურა ალექსანდრე ელისაშვილი ოპოზიციის ნაწილის განცხადებებს იმასთან დაკავშირებით, რომ „მოქალაქეების“ მიერ ომბუდსმენის პოსტზე 19-ვე კანდიდატის წარდგენა, შეიძლება „ქართული ოცნებისთვის” ხელშემწყობი იყოს.
„მოქალაქეების“ ლიდერმა აღნიშნა, რომ ომბუდსმენობის კანდიდატების კენჭისყრა ღია პრინციპით უნდა ჩატარდეს და ყველა დაინახავს, ვინ ვის მისცემს ხმას.
„რას ჰქვია „ქართული ოცნების“ კანდიდატია [მათ შორის]? ქართული ოცნება ვერ წარადგენს თვითონ კანდიდატს?! დავუშვათ 19-ვე „ქართული ოცნების“ კანდიდატია, მერე?! მთავარი კანდიდატების წარდგენა კი არ არის, კენჭისყრა და მხარდაჭერაა. ყველაზე კარგი, რაც ჩვენ გავაკეთეთ ამ პროცესში, არის რეგლამენტში ცვლილება, რომ კენჭისყრა გახდა ღია, ხომ დავინახავთ ვინ მისცემს ხმას და ვინ არა? აქამდე იქნებოდა ეს ნაბიჯი საშიში. ჯერ ერთი, ვინ არის ეს „ოცნების“ კანდიდატი, მეც მაინტერესებს. თუ ვინმეზე გვეტყვით, რომ „ოცნების“ კანდიდატია, ხმას არ მივცემ პერსონალურად მას, იმის მიუხედავად, რომ შეიძლება ძალიან კარგი კანდიდატი იყოს, არ ვიცი. ეს ბოდვა ოპოზიციაში საიდან მოიტანეს?! რაღაცას განსხვავებულად თუ იტყვი, არიქა… რა შუაშია „ოცნება“? ბოდვაა და ცოტა თავი მოთოკონ ამ ჩემმა ოპოზიციონერმა კოლეგებმა ან ჩაიხედონ რაღაცაში. თვითონ რასაც ამბობენ, ეს სრული ჭეშმარიტება რატომ არის? კენჭისყრაა მთავარი. თუ თავისივე პარტიის წევრების ეშინიათ, რომ ჩუმად შეიძლება ხმა მისცენ „ქართული ოცნების“ კანდიდატს?“ – განაცხადა ელისაშვილმა.