გამორიცხული არ არის, ომბუდსმენის კანდიდატზე შეთანხმება ვერ მოხდეს. ასეთ შემთხვევაში, პირველ რიგში, ეს „ნაციონალური მოძრაობის“ წისქვილზე ასხამს წყალს, რადგან ისინი შეეცდებიან მოქმედი სახალხო დამცველის აპარატი შეინარჩუნონ, – განაცხადა პარლამენტის იურიდიული საკითხთა კომიტეტის თავმჯდომარის პირველმა მოადგილემ დავით მათიკაშვილმა.
„ყველაზე მნიშვნელოვანია ორი კრიტერიუმი. ეს არის კომპეტენცია და მიუკერძოებლობა. შესაბამისად, სწორედ ამ კრიტერიუმების შესაბამისად იქნება კითხვები დასმული. იმისდა მიხედვით, თუ რა პასუხები გაიცემა და შეთანხმდება უმრავლესობა და ოპოზიცია, შესაბამისად, რომელიმე კანდიდატზე იქნება აქცენტი გაკეთებული. გამორიცხული არ არის, ასეთი შეთანხმება ვერ მოხდეს. ასეთ შემთხვევაში, პირველ რიგში, ეს „ნაციონალური მოძრაობის“ წისქვილზე ასხამს წყალს, რადგან ისინი შეეცდებიან შეინარჩუნონ მოქმედი სახალხო დამცველის აპარატი“, – განაცხადა მათიკაშვილმა.
სახალხო დამცველის კანდიდატების სია დღეს პარლამენტის ბიუროს წარედგინება. ხვალიდან კი 19 კანდიდატისთვის მოსმენები გაიმართება. მმართველ გუნდს ომბუდსმენის საკუთარი კანდიდატი არ დაუსახელებია. სახალხო დამცველის არჩევისთვის 90 ხმაა საჭირო. მისი არჩევა გამჭვირვალე პროცედურებით ევროკომისიის მე-12 რეკომენდაციაა.