პარლამენტის საპროცედურო საკითხთა კომიტეტის თავმჯდომარე, ირაკლი ქადაგიშვილი აცხადებს, რომ „ნაციონალურ მოძრაობაში“ შიდაპარტიული ბრძოლა მიმდინარეობს, რაც გამოწვეულია იმით, რომ პარტიის პოლიტიკური ხაზი, მათი მიზნები და ტაქტიკა რეალობასა და ქვეყნის ინტერესებს არის აცდენილი.
ქადაგიშვილი სოსო თოფურიძის განცხადებას გამოეხმაურა და აღნიშნა, რომ, სავარაუდოდ, თოფურიძე “ნაცმოძრაობაში” არსებული რომელიღაც დაჯგუფების ინტერესების გათვალისწინებით აკეთებს განცხადებებს.
„ყველა ვხედავთ, რომ „ნაციონალურ მოძრაობაში“ ღრმა კრიზისია, სადაც რამდენიმე დაჯგუფება ებრძვის ერთმანეთს. როგორც ჩანს, სოსო თოფურიძეც რომელიღაც დაჯგუფების ინტერესებით აკეთებს განცხადებას, რათა ამ დაჯგუფებას მეტი საშუალება მიეცეს „ნაციონალური მოძრაობის“ შიგნით ძალაუფლების ხელში ასაღებად.
ეს არის შიდაპარტიული ბრძოლა, რომელიც გამოწვეულია იქიდან, რომ პარტიის პოლიტიკური ხაზი, მათი მიზნები და ტაქტიკა აცდენილია რეალობასა და ქვეყნის ინტერესებს. სწორედ ასეთმა დამოკიდებულებამ შეიყვანა პარტია ასეთ მძიმე კრიზისში, რომლის შედეგია შიდაპარტიული ბრძოლაც. ეს ყველაფერი დამთავრდება პარტიის დასუსტებით, რაც კარგი იქნება საქართველოში პოლიტიკური კლიმატის გაუმჯობესებისთვის“, – განაცხადა ირაკლი ქადაგიშვილმა.