პარტია „გირჩის“ წევრის, ალექსანდრე რაქვიაშვილის თქმით, სახალხო დამცველის შერჩევის პროცესი საინტერესოდ მიმდინარეობს.
როგორც პარლამენტარმა „ქრონიკის“ ეთერში განაცხადა, სახალხო დამცველის შერჩევის პროცესს გამოიყენებენ იმისთვის, რომ კიდევ უფრო გასაგები გახადონ, თუ რისთვის უნდათ იაგო ხვიჩიას სახალხო დამცველად არჩევა.
„ჩვენთვის მთავარია ვაჩვენოთ პირველ რიგში ჩვენ კოლეგებს პარლამენტიდან და შემდეგ ამომრჩეველს, რაშია განსხვავება ჩვენ ხედვებში, როგორც ვუყურებთ ადამიანის უფლებებს, რა არის პრიორიტეტი ადამიანის დაცვის ნაწილში. ჩვენ ვცდილობთ, ეს პროცესი იმისთვის გამოვიყენოთ, რომ კითხვები დავსვათ, ჩვენი პოზიციაც დავაფიქსიროთ და კიდევ უფრო გასაგები გავხადოთ პირველ რიგში პარლამენტარებისთვის, თუ რისთვის გვჭირდება ჩვენ, რომ იაგო ხვიჩია იყოს სახალხო დამცველი და რას გააკეთებს ის თუ სახალხო დამცველი გახდება“, – განაცხადა ალექსანდრე რაქვიაშვილმა.
მისი თქმით, დასვამენ კითხვებს და მაქსიმალურად გამოიყენებენ იაგო ხვიჩიასთვის განკუთვნილ დროს.
„ჩვენ ბევრი პრეტენზია შეიძლება გვქონდეს სახალხო დამცველთან კონკრეტულ ქმედებებში, მაგრამ შეიძლება გაუგებარი იყოს, რის საფუძველზეა ეს პრეტენზიები ჩამოყალიბებული. თუ ადამიანები მიხვდებიან, რა იდეებზე დაყრდნობით ვაყალიბებთ ჩვენ ამ პრეტენზიებს, მათთვის ჩვენი პრეტენზიები უფრო გასაგები იქნება. ჩვენ მოქმედ სახალხო დამცველთან ბევრი პრეტენზია გვქონდა, რადგან ჩვენ სრულიად განსხვავებული წარმოდგენა გვაქვს ადამიანის უფლებებზე“, – განაცხადა ალექსანდრე რაქვიაშვილმა.