“პირადი წყენა აქვს წინა პლანზე – უპრიანია, ამ წყენის მიზეზები საკუთარ თავსა და არასახელმწიფოებრივ გადაწყვეტილებებში ეძებოს”

პოლიტიკაში ერთ-ერთი დამღუპველია, როცა ადამიანი საკუთარი ამბიციებითა და პირადი ემოციებით გამოდის. ანუ პირადი წყენა აქვს წინა პლანზე, – ასე ეხმაურება საპარლამენტო უმრავლესობის წევრი, რატი იონათამიშვილი პარტია „საქართველოსთვის“ ლიდერის, გიორგი გახარიას „ფეისბუქპოსტს“, სადაც გახარია წერს: „დემოკრატიის უდიდესი მტრები კორუფცია და ოლიგარქიაა. საქართველოში ორივე უნდა დამარცხდეს“.

დეპუტატის თქმით, კარგი იქნება, თუ გახარია წყენის მიზეზს საკუთარ ქმედებებში მოძებნის.

„პოლიტიკაში ერთ-ერთი დამღუპველია, როცა ადამიანი საკუთარი ამბიციებითა და პირადი ემოციებით გამოდის. ანუ პირადი წყენა აქვს წინა პლანზე. უპრიანია, ამ წყენის მიზეზები საკუთარ თავსა და არასახელმწიფოებრივ გადაწყვეტილებებში ეძებოს. სხვა მხრივ, ძნელი სანახავია, სხვანაირად ადამიანი როგორ უნდა დაეცეს. ამ რეგრესის ერთ-ერთი თვალსაჩინო მაგალითი სწორედ ეს არის“, – განაცხადა იონათამიშვილმა.