“ჩვენ ვართ მომხრე დეოლიგარქიზაციის, მომხრე ვართ იმისა, რომ ოლიგარქებმა არ დაიბრუნონ ძალაუფლება, რომელსაც ბოროტად იყენებდნენ 9 წლის განმავლობაში. ოპოზიციას პირიქით, სუბიექტური ინტერესი აქვს“, – ამის შესახებ „ქართული ოცნების“ თავმჯდომარემ, ირაკლი კობახიძემ დეოლიგარქიზაციის შესახებ კანონპროექტზე საუბრისას განაცხადა.
მისივე თქმით, ოპოზიციის პოლიტიკური ინტერესია, რომ ძალაუფლება ოლიგარქებმა დაიბრუნონ.
„გამოჩნდა, რომ სინამდვილეში ეს ადამიანები არიან დეოლიგარქიზაციის წინააღმდეგი. მათი პირდაპირი სუბიექტური, პოლიტიკური ინტერესია, რომ ძალაუფლება ოლიგარქებმა დაიბრუნონ. ესენი არიან – სააკაშვილი, კეზერაშვილი და სხვები. ესაა მათი პოლიტიკური ინტერესი. აქედან გამომდინარე, მათ მხარი არ დაუჭირეს კანონს დეოლიგარქიზაციის შესახებ. ჩვენ გავაგრძელებთ ამ კანონპროექტის განხილვას. ნამდვილად მიგვაჩნია, რომ დეოლიგარქიზაცია ნამდვილადაა ჩვენი ქვეყნის ინტერესებში. პრინციპულად მნიშვნელოვანია, რომ ოლიგარქებმა, რომლებმაც ხალხის ხარჯზე მიიღეს სისხლიანი ფული: მილიონები, მილიარდები არ დაიბრუნონ საქართველოში ძალაუფლება. ჩვენ გვაქვს ინფორმაცია, უმაღლეს დონეზე მიღებული, ანუ პირადი კომუნიკაციის საფუძველზე, რომ ისინი ასევე გეგმავენ უკრაინული კანონის გადატანას მოლდოვაში. ესაა ინფორმაცია, რაც ჩვენ გვაქვს. იქიდან გამომდინარე, რომ ოლიგარქის მცნება არის უნივერსალური, ოლიგარქი ვერ იქნება სხვა უკრაინაში და სხვა – საქართველოში. ოლიგარქი არის ოლიგარქი. შესაბამისად, დეფინიცია არის უნივერსალური. აქედან გამომდინარე, დეფინიცია, რომელიც მიღებულია უკრაინაში, რელევანტური იქნება საქართველოსთვისაც. სწორედ ამ ლოგიკის მიხედვით ჩვენც გადმოვიტანეთ უკრაინული კანონი და ასევე მოლდოველებიც გეგმავენ უკრაინული კანონის კოპირებას“, – განაცხადა კობახიძემ.