ვენის უნივერსიტეტის სტუდენტები სტაჟირებას საქართველოს იუსტიციის სამინისტროში გაივლიან, – ამის შესახებ ინფორმაციას საქართველოს იუსტიციის სამინისტრო ავრცელებს.
უწყების ცნობით, შეთანხმება საქართველოს იუსტიციის მინისტრსა და ვენის უნივერსიტეტის დეკან ბრიგიტა ციოხლინგ-იუდისთან შეხვედრისას შედგა.
„რატი ბრეგაძემ პროფესორ ბრიგიტა ციოხლინგ-იუდის კრიმინოლოგიის სფეროში თანამშრომლობაც შესთავაზა და აღნიშნა, რომ ქართული მხარისთვის ძალზედ საინტერესოა ამ მიმართულებით ვენის უნივერსიტეტის იურიდიული ფაკულტეტის აკადემიური წრის გამოცდილების გაზიარება. მინისტრმა დეკანთან საუბარში ასევე აღნიშნა, რომ საქართველო-ავსტრიის იუსტიციის სამინისტროებს შორის გაფორმებული მემორანდუმი თანამშრომლობის ბევრ მიმართულებას მოიცავს.
შეხვედრაზე განსაკუთრებული ინტერესი გამოიწვია საქართველოს იუტიციის სამინისტროს მიერ 2021 წელს დაფუძნებულმა სამართლებრივმა ჟურნალმა „იუსტიციამ“. რატი ბრეგაძემ პროფესორ ბრიგიტა ციოხლინგ-იუდის დეტალური ინფორმაცია მიაწოდა იუსტიციის სამინისტროსთან არსებული სამეცნიერო-საკონსულტაციო საბჭოს თაობაზეც, რომელიც 2022 წლის 1-ელ აგვისტოს დაფუძნდა და სამართლის სხვადასხვა დარგის გამოჩენილი სპეციალისტებით დაკომპლექტდა.
მხარეებმა მჭიდრო, ორმხრივი თანამშრომლობისა და აკადემიურ წრეებთან ერთად ერთობლივი პროექტების განხორციელების იმედი გამოთქვეს.
შეხვედრას ასევე ესწრებოდნენ იუსტიციის მინისტრის მოადგილეები ბუბა ლომუაშვილი და თორნიკე ჭეიშვილი“, – აღნიშნულია გავრცელებულ ინფორმაციაში.