პრემიერი საზოგადოებას ერეკლეობას ულოცავს. ირაკლი ღარიბაშვილის განცხადებაში ნათქვამია, რომ პატარა კახი როგორც მეფეს ხალხმა შეარქვა, სიცოცხლეშივე იქცა ლეგენდად და მან საფუძველი ჩაუყარა ქვეყნის მოდერნიზაციისაკენ მიმართულ მასშტაბურ რეფორმებს. ირაკლი ღარიბაშვილი აღნიშნავს, რომ ერეკლე მეორის გმირული ცხოვრება მისაბაძი მაგალითია თითოეული ქართველისთვის.
„პატარა კახი, როგორც სიყვარულით შეარქვა ხალხმა, სიცოცხლეშივე იქცა ლეგენდად. დიდი ილიას სიტყვებით, იგი ნახევარ საუკუნეზე მეტი ხმალამოღებული პატრონობდა სამშობლოს. განუწყვეტელი ომების მიუხედავად, ერეკლე II-ემ საფუძველი ჩაუყარა ქვეყნის მოდერნიზაციისაკენ მიმართულ მასშტაბურ რეფორმებს სახელმწიფოებრიობის, მრეწველობის, განათლების, კულტურის განვითარებისათვის.
ღვაწლმოსილი მეფე თავის თავში განასახიერებდა ქართველის ყველა საუკეთესო თვისებას – სიბრძნეს, სიმამაცეს, სამშობლოსადმი თავდადებას… მისი გმირული ცხოვრება მისაბაძი მაგალითია თითოეული ჩვენგანისათვის და მჯერა, ასეთად დარჩება ყველა მომავალი თაობისათვის“, – წერს ღარიბაშვილი.