7 ნოემბრის დარბევაში, მის ფორმასა და მეთოდებში იყო მთელი სახე იმ ხელისუფლების, რომელსაც ჰქონდა ეს ძალაუფლება. ყველაზე მეტად მახსენდება გივი თარგამაძის სიტყვები „სულს ამოგხდით“. სული ამოხდის მისწრაფება ყველა ოპონენტის მიმართ, ბოლშევიკურ-ფაშისტური მეთოდების გამოყენება, დემოკრატიის ნიღბით შენიღბული, ყველაზე მეტ აღშფოთებას იწვევდა ჩვენში, – ამის შესახებ უფლებადამცველმა გელა ნიკოლაიშვილმა „იმედი LIVE“-ში განაცხადა.
„2004-შიც, 2005-შიც, 2006-შიც ხდებოდა საშინელი რაღაცები. ეს კარგად იციან ჩემმა კოლეგა ადვოკატებმა, რომელთაც შეხება ჰქონდათ ციხესთან და რა ხდებოდა იქ განსაკუთრებულად კარგად ჩანდა. ჩვენ გვეუბნებოდნენ, რომ ეს არის დემოკრატიის შუქურა, რომ ეს არის სწორედ ის დასავლეთი, რისკენაც ჩვენ მივისწრაფოდით. ეს ხომ ჩვენი მისწრაფება მართლაც იყო და გამოდიოდა, რომ ეს იდეალები და მისწრაფებები ფაქტობრივად ტალახში ისვრებოდა. ჩვენ გვითხრე, რომ ძალაც ჰქონდათ, უფლებაც, თქვენგან მონიჭებული უფლება არისო. დღესაც გვეუბნებიან, რომ დემოკრატიული ხელისუფლება იყვნენ, არაავტორიტარული და გვეუბნებიან, რომ მათ უფრო უკეთესი პირობები ჰქონდათ ბიზნესისთვის, მედიისთვის, პენიტენციური სისტემისთვის. დღესაც რომ ამას ამბობენ, ჩემი აზრით „ბურბონებმა ვერც ვერაფერი დაივიწყეს და ვერც ვერაფერი ისწავლეს“ სწორედ მათზე ნათქვამი“, – განაცხადა ნიკოლაიშვილმა.
2007 წლის 7 ნოემბრის მოვლენებიდან 15 წელი გავიდა. სამი დარბევა ერთ დღეს, აქციის დაშლა რუსთაველის გამზირსა და რიყეზე, შეჭრა ტელეკომპანია „იმედში“ – სპეცდანიშნულების რაზმმა მომიტინგეების წინააღმდეგ ცრემლმდენი გაზი, ხელკეტები, რეზინის ტყვიები, აკუსტიკური იარაღი და წყლის ჭავლი გამოიყენა. 7 ნოემბრის საღამოს კი სპეცრაზმი ტელეკომპანია „იმედში“ შემოიჭრა და არხის მაუწყებლობა გათიშა.