„ძველი გვარდია“, რომელიც მიშას ჰყავს, უკრაინაშია და ისინი უკრაინას იყენებენ, რათა თავის პოლიტიკურ მიზანს მიაღწიონ, ეს რომ საქართველოს შიგნიდანაც დალაგებული ყოფილიყო, აქაც ექნებოდა შედეგი, – ამის შესახებ „გირჩის“ დეპუტატმა, სანდრო რაქვიაშვილმა „პალიტრანიუსის“ გადაცემა „ნიუსრუმში“ განაცხადა.
რაქვიაშვილის შეფასებით, „ნაციონალურ მოძრაობას“ „გააზრებული პოლიტიკა არ ეტყობა“.
„ძველ გვარდიას“, რომელიც მიშას ჰყავს, რაც ვიცით, მათ საქმის კეთება შეუძლიათ – ეს ხალხი უკრაინაში იმყოფება და ისინი უკრაინას იმისთვის იყენებენ, რომ თავის პოლიტიკურ მიზანს მიაღწიონ – მიშას გადარჩენა თავის თავზე სწორედ მისმა „ძველმა ხალხმა“ აიღო, რომელიც მის მიმართ, როგორც ჩანს, დღემდე ერთგულია. ეს, ფაქტობრივად, პოლიტიკური ვაჭრობის საკითხია – „მე ამას გავაკეთებ, პრობლემებს შეგიქმნი, შენ თუ გინდა პრობლემები არ გქონდეს, გამიშვი ან რაღაც გამაკეთებინე”. ეს რომ შიგნიდანაც დალაგებული ყოფილიყო და მართლა პროცესი რომ ყოფილიყო, აქაც, საქართველოშიც ექნებოდა შედეგი.
წარმოიდგინეთ, „ნაციონალური მოძრაობა“ საქართველოში ძალიან აქტიურია, საგამოძიებო კომისიები იქმნება, პარტია რაღაც იდეისთვის იბრძვის და ქვეყანაში დაძაბულობაა, რაღაც ამორფული სხეული კი არ არის, აქაც რომ იგივე ყოფილიყო [რაც უკრაინაში] და „ქართული ოცნებისთვის“ რთული პროცესი წარმართულიყო, ამას აქაც ექნებოდა შედეგი. ის ადამიანები, რომლებიც საზღვარგარეთ არიან „ნაციონალური მოძრაობიდან“, აშკარად ეფექტიანად მუშაობენ, ვიდრე შიგნით. შეიძლება დეკანოიძეც დადის უცხოეთში და შეიძლება აქედანაც ვიღაც ეხმარებათ, მაგრამ შიდა ფრონტზე [სააკაშვილის გასათავისუფლებლად] არაფერი ხდება“, – განაცხადა რაქვიაშვილმა.
მან ასევე ისაუბრა ოპოზიციური პარტიების შესაძლო გაერთიანების შესახებ. როგორც თავად აღნიშნა, „ნაციონალური მოძრაობა“ მსგავს გაერთიანებაში მონაწილეობის მიღებას „წარსული გაკვეთილის“ გამო არ აპირებს. რაქვიაშვილი მიიჩნევს, რომ სხვა ოპოზიციურ პარტიებთან გაერთიანებაზე „ნაციონალური მოძრაობის“ უარი ლოგიკური იყო.
„ნაცებმა“ გაკვეთილი მიიღეს, რადგან ამ პარლამენტში სიაში სხვადასხვა ხალხი შეიყვანეს, რომელიც, ფაქტობრივად, პარტიული აქტივი არ იყო. ეს ხალხი პარტიის ირგვლივ კი არ იყო გაერთიანებული, სხვადასხვა მოტივით იყო – ფულიდან დაწყებული, უბრალოდ პარლამენტში მოხვედრით დამთავრებული. ეს ხალხი უცნაურ კონგლომერატად იქცა. მგონი, რომ „ნაციონალურ მოძრაობაში“ ესეც გაითვალისწინეს და ამიტომაც უთხრეს უარი გაერთიანების იდეაზე. თუ ამ გაერთიანების საკითხზე ჩემთვის ყველაფერი ლოგიკურია, პარტიის შიგნით რაც ხდება, ჩემთვის აბსოლუტურად გაუგებარია“, – აღნიშნა რაქვიაშვილმა.