მადლობა მინდა მინისტრს ვუთხრა ამომწურავი პასუხებისთვის. აღსანიშნავია, რომ თავად ინტერპელაციის კითხვის ავტორმაც კი შეგაქოთ და მოხსნა ის საკითხები, რომელიც დაისვა, – განაცხადა განათლებისა და მეცნიერების კომიტეტის თავმჯდომარემ, გიორგი ამილახვარმა პარლამენტის პლენარულ სხდომაზე, სადაც ინტერპელაციის წესით, განათლებისა და მეცნიერების მინისტრს, მიხეილ ჩხენკელს მოუსმინეს.
კომიტეტის თავმჯდომარის შეფასებით, განათლებისა და მეცნიერების მინისტრთან საგნობრივ საკითხებზე მსჯელობა მეტ-ნაკლებად შედგა, თუმცა გამოიკვეთა, რომ კითხვის ავტორები თავად არ არიან სათანადოდ მომზადებულები.
„მინდა ოპოზიციას შევახსენო, რომ სკოლების ნგრევა ჩვენი ხელისუფლების ხელწერა არ არის და ეს იმ პოლიტიკური ძალის ხელწერა იყო, რომელსაც დღეს თქვენ წარმოადგენთ. ამიტომ მხოლოდ მშრალ ფაქტს და ციფრს გეტყვით, რომელიც უპრეცედენტოა ქართულ საგანმანათლებლო ისტორიაში და ეს არის პრემიერ-მინისტრის ინიციატივა და რომელიც 800 სკოლის რეაბილიტაცია-აშენებას შეეხება. პრაქტიკულად 2026 წლისთვის ყველა საჯარო სკოლაში მოცემულობას მივიღებთ, რომ ინფრასტრუქტურულად ყველა სკოლა მოწესრიგდება და საერთაშორისო ევროპულ სტანდარტებს გაუთანაბრდება. ეს არის ჩვენი ხედვა და გეგმა ამ პრობლემების მოსაგვარებლად და ახლა რაც არ უნდა ვაქცენტირდეთ ერთ კონკრეტულ, მათ შორის, ისტორიულ სკოლაზე, რომელზეც საუბრობთ, პასუხი არის ძალიან ნათელი – ამ კონკრეტული სკოლის დემონტაჟი არ მოხდება ისე თუ შესაბამისი დასკვნები და ნებართვები არ იქნება“, – განაცხადა კომიტეტის თავმჯდომარემ.
გიორგი ამილახვარმა განათლების ინტერნაციონალიზაციის მიზნით სამინისტროს ხედვებზე ისაუბრა, რაც მისი განცხადებით, საერთო დიპლომების, ორმაგი დიპლომების, საერთაშორისო უცხოური უნივერსიტეტების საქართველოში შემოსვლას გულისხმობს. „როგორც უმაღლეს განათლებაში, ასევე სკოლებში დღეს დაახლოებით ოცამდე პროგრამა ფუნქციონირებს რამდენიმე უცხოური, მათ შორის, ამერიკული უნივერსიტეტია შემოსული საქართველოში და ამ საქმეში პირადად მინისტრის წვლილი დიდია“, – აღნიშნა გიორგი ამილახვარმა.
გამოსვლის დასასრულს, კომიტეტის თავმჯდომარემ, განათლებისა და მეცნიერების მინისტრს ინტერპელაციაზეწარდგენილი პასუხებისთვის მადლობა გადაუხადა და სამომავლო საქმიანობაში წარმატებები უსურვა.