ჰერმან საბო მიხეილ სააკაშვილს განცხადებას გამოეხმაურა. „გირჩის“ წევრის თქმით, საქართველოს მესამე პრეზიდენტის ჯანმრთელობა უკვე 1 წელია განხილვის საგანია და მისთვის გაუგებარია, რატომ გააკეთეს მისმა ადვოკატებმა განცხადება მისი მოწამვლის შესახებ.
„მიშას ჯანმრთელობა უკვე 1 წელია განხილვის საგანია, ხან რა ჭირს, ხან რა, მერე ხან მტკიცდება ეს პრობლემები, ხან არა. ამ შემთხვევაში ვნახეთ მოწამვლის ეპიზოდზე საუბარი, რომელზეც თავად განაცხადა, ასეთი არაფერიო. მე ლოგიკას ვხედავ მის ამ განცხადებაში. მიხეილ სააკაშვილი ხვდება, რომ მისი ქვეყნის თუ საპატიმროს დატოვების ერთადერთი გზა არის ის, რომ მისი საკითხი რაც შეიძლება ნაკლებად პოლიტიზებული იყოს და ის დისტანცირდეს ქართული პოლიტიკისგან. მე უბრალოდ ვერ ვხვდები რა მიზანი ჰქონდათ მის ადვოკატებს, რომლებმაც გააჟღერეს ეს საკითხი“, – განაცხადა საბომ.
მიხეილ სააკაშვილის ადვოკატმა ვალერი გებახიანმა ორი დღის წინ განაცხადა, რომ უცხოელი ექსპერტიების დასკვნის თანახმად, ექსპრეზიდენტი მოწამლულია. გუშინ იუსტიციის მინისტრმა რატი ბრეგაძემ ყველას მოუწოდა, თავი შეიკავონ გადაუმოწმებელი ინფორმაციის გავრცელებისგან. ასევე, მიმართა ლევან სამხარაულის სახელობის ექსპერტიზის ეროვნულ ბიუროს, ჩატარდეს ტოქსიკოლოგიური ექსპერტიზა და საზოგადოებას ჰქონდეს სრული და ამომწურავი ინფორმაცია მიხეილ სააკაშვილის ჯანმრთელობის მდგომარეობის შესახებ.
დღეს კი საქართველოს მესამე პრეზიდენტმა „ფეისბუქის“ საკუთარ გვერდზე დაწერა, რომ მას არასდროს უთქვამს თავისი ადვოკატებისთვის, რომ ეჭვი აქვს მოწამვლაზე.