მოწამვლაზე დეზინფორმაციით სცადეს საზოგადოების შეცდომაში შეყვანა. აღმოჩნდა, რომ მათმა მხარდაჭერებმაც არ დაიჯერეს ეს საკითხი, – ამის შესახებ საპარლამენტო უმრავლესობის წევრმა რატი იონათამიშვილმა სააკაშვილის შესაძლო მოწამვლის შესახებ გავრცელებულ ინფორმაციასთან დაკავშირებით განაცხადა.
„როდესაც იუსტიციის მინისტრმა ექსპერტიზის ბიუროს სთხოვა შეესწავლათ ეს საკითხი, მიხვდნენ, რომ მათ ეს დეზინფორმაცია და ტყუილი დიდხანს ვერ იცოცხლებდა და უკვე თვითაღიარებად რეჟიმში გადავიდნენ. ეს განპირობებულია იმით, რომ ისინი მუდმივად გამოდიან სპეკულაციებით და მანიპულაციებით სააკაშვილის ჯანმრთელობაზე. ეს სპეკულაციები ძალიან სწრაფად ქარწყლდება და ისევ საკუთარ რეპუტაციას აზიანებენ ხოლმე“, – აცხადებს იონათამიშვილი.
მიხეილ სააკაშვილის ადვოკატმა ვალერი გებახიანმა ორი დღის წინ განაცხადა, რომ უცხოელი ექსპერტიების დასკვნის თანახმად, ექსპრეზიდენტი მოწამლულია. გუშინ იუსტიციის მინისტრმა რატი ბრეგაძემ ყველას მოუწოდა, თავი შეიკავონ გადაუმოწმებელი ინფორმაციის გავრცელებისგან. ასევე, მიმართა ლევან სამხარაულის სახელობის ექსპერტიზის ეროვნულ ბიუროს, ჩატარდეს ტოქსიკოლოგიური ექსპერტიზა და საზოგადოებას ჰქონდეს სრული და ამომწურავი ინფორმაცია მიხეილ სააკაშვილის ჯანმრთელობის მდგომარეობის შესახებ.
დღეს კი საქართველოს მესამე პრეზიდენტმა „ფეისბუქის“ საკუთარ გვერდზე დაწერა, რომ მას არასდროს უთქვამს თავისი ადვოკატებისთვის, რომ ეჭვი აქვს მოწამვლაზე.