GWP -ის აბონენტებისთვის სამომხმარებლო ტარიფი უცვლელი დარჩა

GWP – ის 2017 წლის საყოფაცხოვრებო ტარიფი მრიცხველიანი და უმრიცხველო აბონენტებისთვის უცვლელი დარჩა, კომერციული ობიექტებისთვის კი ერთნახევარი თეთრით გაიზარდა.
აღნიშნული გადაწყვეტილება სემეკ-მა სხდომაზე მიიღო, სადაც ასევე განიხილებოდა “რუსთავის წყლისა” და “მცხეთის წყლის” ტარიფები.
რუსთავის მომხმარებლების ნაწილისთვის წყლის ტარიფი გაიზარდა. გამრიცხველიანებული საყოფაცხოვრებო მომხმარებლებისთვის წყალმომარაგების ზღვრული ტარიფი – 0.343 ლარი კუბურ მეტრზე, იგივე დარჩა. 0.111 ლარით მოიმატა გაუმრიცხველიანებელი საყოფაცხოვრებო მომხმარებლებისთვის წყალმომარაგების ზღვრულმა ტარიფმა და ნაცვლად სულზე 1.754 ლარისა ,  სულზე 1.865 ლარი გახდა.
რაც შეეხება ტარიფს არასაყოფაცხოვრებო მომხმარებლისთვის, წყალმომარაგების ზღვრული ტარიფი – 2.284 ლარი კუბურ მეტრზე 0.441 ლარით გაიზარდა და კუბურ მეტრზე 2.725 ლარი გახდა.
რაც შეეხება „მცხეთის წყალს“, ამ შემთხვევაში სამომხმარებლო ტარიფი გამრიცხველიანებული და გაუმრიცხველიანებელი აბონენტების შემთხვევაში უცვლელი დარჩა, ხოლო კომერციული ტარიფი ერთი ლარით შემცირდა.